Alfons Tuor
Alfons Eduard Tuor (1871-1904), autur rumantsch da la fasa naziunalista e cumbatanta. Liricher.
Poesia modifitgar
Allas steilas
O schei vus caras steilas
El firmament:
Pertgei viv'ins sin tiara
Mo in mument?
Pertgei ston ins sin tiara
Pitir, pitir,
Quei cuort mument ch'ins viva
E lu murir?
O dei vus caras steilas
A mi avis,
Vus che la stgira tiara
Schi dultsch sclaris!
Savens, savens jeu stoiel
Vus contemplar -
Tgi lai cun tonta gloria
Vus tarlischar?
O, quel ch'ei vies Scaffider
Ha mei scaffiu,
Quel che vies cuors diregia
Ei er miu Diu!
Perquei il mal emblida
Miu cor suffrent,
Cu'l ellas sferas vesa
Vus a sclarend.
O caras, dultschas steilas,
Jeu sai, jeu sai:
Sur vus, en tschiel, leu vivan
Ils spérts beai!
E cu jeu vus contemplel
El firmament,
Sai jeu pertgei ch'ins viva
Mo in mument!
