Bob Dylan
Bob Dylan (legalmaing Robert Dylan, nat Robert Allen Zimmerman als 24 da mai 1941) es ün chantautur american. El es ün chantautur fich renomnà cun üna carriera da passa 60 ons. Sias chanzuns las plü cuntschaintas sun scrittas aint ils ons 1960, per exaimpel chanzuns sco “Blowin’ in the Wind” dal 1963 e “The Times They Are a-Changin” dal 1964, chi sun gnüdas acceptadas sco imnas da luottadras e luottaders pels drets civils ed il moviamaint cunter la guerra. Dürant quista perioda han seis texts gnü sco temas la politica, ils drets socials, la filosofia ed influenzas litteraras. Quai d'eira cunter tuottas normas da la musica populara e plü daspera a la nouva cuntercultura.
Dylan es nat e trat sü i’l St. Louis County in Minnesota. Davo seis disc da debüt chi vaiva sco titel sein nom (1962), chi cuntgnaiva principalmaing chanzuns tradiziunalas da folk, ha Dylan dat üna svouta a sia carriera sco chantautur cun il disc The Freewheelin' Bob Dylan dal 1963. Quist album es dvantà famus eir grazcha a chanzuns sco "Blowin' in the Wind" e "A Hard Rain's a-Gonna Fall", chi’d es tematicamaing cumplexa. Bleras da sias chanzuns s’inservan da las melodias e da las fraseologias da veglias chanzuns da folk. El ha cuntinuà a publichar discs ingaschats politicamaing sco The Times They Are a-Changin' ed il plü introspectiv ed abstact Another Side of Bob Dylan dal 1964. Dal 1965 e 1966, ha’l fat sensaziun e sdasdà disputaziuns culs purists da la musica folk cur cha’l ha cumanzà a sunar sia musica cun instrumaints da rock amplifichats electricamaing. In be 15 mais ha'l registrà trais dals plü importants ed influenzius albums da rock dals ons sesanta: Bringing It All Back Home, Highway 61 Revisited (tuots duos il 1965) e Blonde on Blonde (1966). Seis hit da ses minuts "Like a Rolling Stone" (1965) ha schlargià ils cunfins commercials e creativs da la musica populara.
In lügl 1966 ha ün accidaint cul töf causà la retirada da Dylan da sias tourneas musicalas. Dürant quist temp ha’l registrà bleras chanzuns cun commembers da la gruppa “the Band”, chi til vaiva güdà fingià i'l passà. Quistas registraziuns sun stattas publichadas aint in l’album collaborativ “The basement tapes” dal 1975. Tanter la fin dals ons sesanta e’l principi dals ons settanta, ha Dylan experimentà cun la musica country e temas rurals aint in “John Wesley Harding” (1967), “Nashville Skyline” (1969), e “New Morning” (1970). Dal 1975 ha’l publichà “Blood on the Tracks”, cha blers han cuschidrà ün retuorn a la fuorma originala. Vers la fin dals ons settanta, è’l dvantà cristian ed ha lavurà vi da blers albums da musica gospel avant da tuornar al rock dürant ils ons ottanta. Seis album “Time Out of Mind”, sorti dal 1997, ha marcà il cumanzamaint dal renaschentscha da sia carriera. Davo quist ha’l publichà tschinch albums chi han survgni recensiuns fich positivas. Il plü nouv es “Rough and Rowdy Ways” (2020).
El ha eir registrà üna seria da trais albums tanter 2010 e 2020 chi cumpigliaivan versiuns da chanzuns tradiziunalas americanas, impustüt da Frank Sinatra. Bob Dylan ha cumanzà üna turnea cuntinuanta vers la fin dals ons ottanta chi'd es cuntschainta sco la “Never Ending Tour”, “la turnea chi mai nu finischa”.
Daspö il 1994 ha Dylan publichà nouv cudeschs cun purtrets e disegns. Si’ouvra es gnüda muossada in las grondas gallarias d’art. El ha vendü daplü co 145 milliuns registraziuns ed es cun quai ün dals musicists cul plü grond success. El ha tschüf numerus premis, tanter quels la "Presidential Medal of Freedom", desch "Grammy Awards", ün "Golden Globe Award" ed ün "Academy Award". Dylan es gnü introdüt in la "Rock and Roll Hall of Fame", la "Nashville Songwriters Hall of Fame" e la "Songwriters Hall of Fame". La cumischiun dal premi da Pulitzer 2008 til han dat ün manzun special ("special citation") per "sia influenza profuonda sül chomp da la musica populara e sün la cultura americana cun cumposiziuns liricas da forza poetica singulara". Dal 2016 ha Dylan tschüf il premi da Nobel per litteratura “per avair creà nouvs möds d’expressiun poetica in la gronda tradiziun da la chanzun americana ”.
Tanter ils musicists chi sun inspirats da Bob Dylan, nomna la Posta Engiadinaisa a Paulin Nuotclà.[1]