Ernst Lechner
Ernst Lechner (era Ernest; * 18 d'october 1825 a Lipsia, Saxonia, Germania; † 12 da december 1912 a Tusaun) era in reverenda tudestg.
Vita
modifitgarErnst Lechner è naschì l'onn 1825 a Lipsia en la Germania, nua ch'il bap Sigmund (oriund da Nürnberg) era inspectur da scola. Suenter aver fatg tras il gimnasi a Nürnberg, ha el studegià filosofia a Lipsia e per in onn a Tubinga. El prendeva activamain part a la Burschenschaft da quels temps ed è daventà l'onn 1849 docter da la filosofia. I suandavan studis teologics a Turitg. Per in tschert temp era el provisor giu'l Toggenburg ed a Schlarigna. Il 1851 ha el absolvì ses examen teologic a la sinoda da Bravuogn e lu predgià per dus onns a Nufenen. Il zercladur 1853 ha el surpiglià la pravenda da Schlarigna e gia a la fin d'october salvà si'emprima predgia rumantscha. A medem temp era el activ a San Murezzan. Dal 1861 al 1865 ha el predgià a Stampa e dal 1865 Tusaun e Masagn. L'onn 1898 u 1899 è el sa retratg a Schlarigna. Ernst Lechner è mort l'onn 1912 a Tusaun.
Ovra
modifitgarErnst Lechner ha publitgà per tudestg numerusas monografias turisticas. La principala, Graubünden. Illustrierter Reisebegleiter durch alle Talschaften dal 1903 è cumparda en tschintg ediziuns, l'ultima giada l'onn 1920. Ultra da quai è el sa fatschentà cun l'emigraziun grischuna ed ha fatg stampar il 1909 il volum Die periodische Auswanderung der Engadiner und anderer Bündner (segunda ediziun il 1912).
Per rumantsch ha el publitgà il 1855 in Pitschen Catechisem ed il 1857 ensemen cun il magister Heinrich las Istorias della sencha scrittüra. L'onn 1857 è cumparì il tom Chanzuns religiusas cun versiun sias e d'oters.
Dal 1855 al 1857 ha Lechner redigì ensemen cun reverenda Nicholas Vital la Dumengia-saira en la quala el ha era publitgà atgnas poesias. L'ediziun dal 1858 ha el dà ora sulet.
Funtaunas
modifitgar- Adolf Collenberg: Ernst Lechner en il Lexicon istoric retic
- Peider Lansel: Musa ladina. Antologia da la poesia engiadinaisa moderna, precedüda d'üna cuorta survista da nossa litteratura poetica. Engadin Press, Samedan 1910.