Federica de Cesco

Federica de Cesco (* 23 da mars 1938 a Pordenone, Italia) è ina scriptura svizra.

Vita

Federica de Cesco è naschida l’onn 1938 a Friaul, ina regiun en l‘Italia dal Nord. Sie mamma ha discurrì tudestg, il bab era Talian. Ella è creschida si billing e discurra currentamain talian, tudestg e franzos, perquai ch’ella viveva durant la segunda guerra mundiala cun ses geniturs en Etiopia, Italia, Frantscha, Germania e Belgia. Federica de Cesco ha studegià istorgia d’art e psicologia a l’universitad da Lüttich. 1962 è ella dischlochada en Svizra; ozendi viva ella a Lucerna. Dapi l’onn 1971 è ella maridada cun Kazuyuki Kitamura, in fotograf giapunais. Federica de Cesco ha dus uffants d‘emprima letg, Manuela Federica e Marc-Daniel.

Ella viagescha gugent ed ha vivì in temp tar ils Tuareg, in pievel nomad en la Sahara. En blers cudeschs ha ella elavurà las experientschas dals viadis e sia savida etnologica. Ils protagonists da sias istorgias èn savens mattas independentas, che rebelleschan encunter normas imponidas.

2008 ha il reschissur Nino Jacusso fatg in film davart la vita da Federica de Cesco. Dapi l’onn 2013 s’engascha ella per la furmaziun d’uffants dal pievel indian Lakota.

Creaziun litterara

En ils territoris tudestgs è Federica de Cesco enconuschenta sco autura da cudeschs per uffants e giuvenils. Sias ovras raquintan savens da culturas, religiuns u vistas estras. En la vegliadetgna da 15 onns ha ella scrit sia emprima ovra, ina istorgia davart indians che sa numna „Der rote Seidenschal“.

Federica de Cesco ha publitgà passa 50 cudeschs; dapi l‘onn 1994 scriva ella era romans per creschids.