Gasetta Coop

La Gasetta Coop (num rumantsch da la Coopzeitung da lingua tudestga) è la gasetta gratuita emnila dal grossist svizzer Coop.

La Gasetta Coop è cumparida l'emprima giada l'onn 1902, a lez temp anc sut il titel Genossenschaftliches Volksblatt ("Fegl popular da la cooperativa"). Ella vegn stampada mintg'emna cun in'ediziun da passa in milliun exemplars e spedida tranter auter a tut ils commembers da la Coop e tut ils clients che possedan la carta da clients Supercard. Cun in'ediziun da stampa da 1'770'380, confermà da la WEMF, è ella la gasetta cun l'ediziun la pli gronda en Svizra. Chauredactur è Matthias Zehnder. L'ediziun da lingua franzosa ha num Coopération, quella da lingua taliana Cooperazione.

Il concurrent il pli ferm da la Coopzeitung è il Migros-Magazin, la gasetta da l'emna dal grossist Migros, cun pli u main ils medems dumbers d'ediziun e da lecturs. La Neue Zürcher Zeitung intitulescha las duas gasettas sco «stille Riesen» dal sectur da medias svizzer e descriva lur activitad schurnalistica uschia: Offenkundig findet das Konsumentensegment ebenso Gefallen an mehrheitsfähiger Alltags- und Lifestyle-Thematik wie an politisch austarierten Hintergrundberichten.

Connex cun la Rumantschia

Dapi l'onn 1990 publitgescha la Coopzeitung da lingua tudestga er artitgels per rumantsch. I vegn tractà ina gronda varietad da temas, quasi adina cun resguard a l'intschess rumantsch. Ultra da quai datti mintgatant er artitgels davart tematicas actualas da la Rumantschia per tudestg. Chattà (www.chatta.ch) manegia: «Quasi sco effect lateral renda la gasetta [...] pia adina puspè attenta la [S]vizra tudestga a la lingua naziunala la pli pitschna.»

Colliaziuns

• Pagina d'internet da la Gasetta Coop (tudestg, artitgels per rumantsch en l'archiv)