Giovanni Giacometti

Giovanni Giacometti (* 7 da mars 1868 a Stampa; † 25 da fanadur 1933 a Glion, vischnanca da Montreux VD) è stà in pictur e graficher svizzer. El ha introducì ensemen cun ses ami, il pictur Cuno Amiet, il stil dal postimpressiunissem en l'art svizra.

Autopurtret, 1909/10, Kunstmuseum Winterthur

Vita

Atelier Giacometti a Stampa, inscripziun sin la terza trav da sutensi

Giovanni Giacometti era il quart dad otg uffants dad Alberto e Caterina Ottilia Giacometti-Santi. El ha studegià dal 1886 fin il 1887 a Minca e dal 1888 fin il 1891 ensemen cun Cuno Amiet ed Andrea Robbi tar William Adolphe Bouguereau e Joseph Nicolas Robert-Fleury a l'Académie Julian a Paris. Influenzà è'l vegnì dals Fauves, da Cuno Amiet, Paul Cézanne, Vincent van Gogh ed a l'entschatta da sia carriera artistica oravant tut da Giovanni Segantini, che l'ha sustegnì a partir dal 1894 a Malögia. Enturn l'onn 1900 è'l sa statgà da la tempra divisiunistica da Segantini ed ha entschet dad adoptar il stil postimpressiunistic da la pictura franzosa.

Giacometti ha maridà il 1900 Annetta, naschida Stampa (1871–1964); lur uffants eran Alberto, Diego, Ottilia (1904–1937) e Bruno Giacometti. Enfin l'onn 1904 viveva la famiglia a Borgonovo en Bregaglia; lura ha'la midà a Stampa en ina chasa cun ina stalla che Giovanni Giacometti duvrava sco atelier. La famiglia ha passentà la stad regularmain a Cadlägh (Capolago) sper Malögia. Il 1904 è Giacometti vegnì envidà da far in'exposiziun ensemen cun ils artists da la gruppa artistica Brücke a Dresda en la Germania. Ils onns 1906 fin 1911 ha'l picturà en stil expressiv. Il 1912 ha'l gì in'exposiziun en il Kunsthaus da Turitg.

Ovra

L'ovra da Giacometti consista da pictura da paesagis impressiunistica e da purtrets da sia famiglia e da persunas vischinas sco la pictura Elvezia Michel-Baldini. Per part èn ses maletgs era picturads en il stil dal simbolissem. Sias lavurs èn represchentadas en la gronda part dals museums svizzers.

• 
  Segantini sin il letg da mort, 1899
• 
  Saira d'autun, 1903
• 
  Il paun, 1908
• 
  Purtret Annetta Giacometti, 1911
• 
  Purtret da famiglia sut il suvi, 1911
• 
  Purtret Ottilia Giacometti, 1912
• 
  Capolago cun vista sin il Corvatsch, enturn il 1926
• 
  Natira morta cun plastica (Purtret Alberto Giacometti), 1929

Litteratura

• Dieter Schwarz, Paul Müller, Viola Radlach: Giovanni Giacometti 1868–1933. 3 Bände. Zürich 1996/1997 (Œuvrekataloge Schweizer Künstler, Band 16/I/II-1/2)
• Christine E. Stauffer: Giovanni Giacometti. Das graphische Werk. Verlag Kornfeld, Bern 1997
• Giovanni Giacometti (1868–1933). Arbeiten auf Papier. Ausstellungskatalog, mit Texten von Ulrich Gerster, Christoph Vögele und Beat Stutzer. Kunstmuseum Solothurn / Bündner Kunstmuseum, Chur. Kehrer Verlag, Heidelberg 2006.

Colliaziuns

Commons

Commons: Giovanni Giacometti – Collecziun da maletgs, videos e datotecas d'audio

• Giovanni Giacometti en il Lexicon istoric retic
• Dossier Famiglia Giacometti sin chattà.ch