Glatscher dal Vorab
Il Vorab è in glatscher sin il cunfin dal Grischun cun il chantun Glaruna. Dals Glarunais ha el evidentamain survegnì ses num (vore abe; davant giu).
Il glatscher sa chatta exactamain sin il cunfin dals dus chantuns. Dapi ils onns settanta vegn el duvrà turisticamain entras in runal dubel ed antruras anc dad ina sutgera sin la flanca da la muntogna Vorab pign. Las taglias da las pendicularas ha onns ed onns incassà la vischnanca da Sagogn cun pretender ch'il glatscher, cleramain en il territori da Laax, tutga tar in'alp regalada a Sagogn dal avat da Mustér a l'entschatta dal 15avel tschientaner. Tge animals che ils purs da Sagogn vulevan laschar pascular sin il glatscher dal Vorab n'è betg enconuschent. A la fin è la dispita vegnida schliada da la dretgira federala a Losanna en favur da Laax. Igl è stat nairas uras da decider questa dumonda, perquai che en entgins onns pudess il glatscher esser trasfurmà en aua e currì en direcziun da la Mar dal Nord. La digren dal glatscher plitost pitschen è talmain evident e spert, ch'ins ha l'onn 2006 per l'emprima giada vulì fermar quel svilup cun cumbatter sintoms, las pendicularas han numnadamain rasà or ina taila alva che duess salvar il glatscher dal Vorab u silmain prolungar sia vita per intgins onns. L'avertura da stad tradiziunala en ils onns 70 ed 80 ha pia stuì far plaz ad ina cuverta.