Johann Rudolf Wettstein

Johann Rudolf Wettstein (* 27 d'october 1594; † 12 d'avrigl 1666 a Basilea) era in diplomat svizzer e burgamester da Basilea.

Vita

Wettstein era il figl d'in viticultur oriund da Russikon (chantun Turitg) che lavurava sco tschalerer en il spital da Basilea e ch'è pli tard avanzà al maister da spital. Da 1600 enfin 1608 ha Wettstein visità la "Schule auf der Burg", l'hodiern "Gymnasium am Münsterplatz". Suenter in emprendissadi da chanzlist ad Yverdon e Genevra marida el 1611 Anna Maria Falkner. 1616 è el entra per curt temp en sold venezian. Turnà a Basilea, fa el carriera en la citad e vegn elet 1620 en il Cussegl pitschen. Ils proxims onns recaltga el ulteriurs uffizis publics. 1635 daventa el maister suprim da las mastergnanzas (Oberzunftmeister) e 1645 burgamester da la citad Basilea.

A las tractativas da la pasch da Vestfalia a Münster ed Osnabrück 1646/47 ha Wettstein pri part sco representant da la Confedereziun, senza esser envidà ed a l'entschatta era senza legitimaziun uffiziala da la Confederaziun Svizra. Suenter lungas e diras trattatuvas cuntanscha el 1648 la suveranitad giuridica e cunquai factimain la spartiziun da la Svizra dal Sontg Imperi Roman da naziun tudestga. Wettstein metta uschia la basa per l'independenza da la Svizra.

Wettstein mora en sia citad da naschentscha l'onn 1666. El vala sco in dals pli inschignus politikers da ses temp.