Martin Raschèr

Martin Raschèr (*1920; burgais da Zuoz, †10-2-2016) è sta in anteriur magister e scrivent rumantsch. El ha publitgà ses emprim cudesch cun passa 91 onns.

Vita

Sco uffant illegitim è Martin Raschèr creschì si tar ses nons sin in bain puril a Zuoz.

Suenter il seminari scolastic a Cuira ha Raschèr frequentà la scola da sutuffiziers ed ha prestà durant trais onns servetsch militar. A partir dal 1943 ha el instruì a Termin (Trimmis) e lu a l'internat a Freienstein en il chantun Turitg. Dasper sia lavur da magister ha el fatg il studi da pedagogia curativa. Alura ha el durant 19 onns dà scola ad Arosa. Sin quai è Raschèr turnà a Freienstein, nua ch'el ha surpiglià la direcziun da l'internat. En quest post è el stà fin tar sia pensiun. Dapi lura viva el a Grub en il chantun Argovia.

Ovra

Curt suenter sia pensiun il 1985 ha Martin Raschèr fatg in curs da scriver ed ha cumenzar a notar reminiscenzas per sia dunna e ses dus uffants; quai per tudestg damai che sia famiglia na sa betg rumantsch. 35 istorgias ha el rimnà en in pitschen carnet cun il titel Seifenwasser dal qual el ha regalà otg exemplars. In da quels exemplars ha el regalà ad in anteriur scolar che en il fratemp ha emprendì rumantsch e che ha intimà Raschèr da scriver si sias reminiscenzas per rumantsch. Pli tard ha el cumenzà da translatar sias istorgias en puter. «Pli ditg ch'jau ma fatschentava cun la translaziun e pli lev ch'ella gartegiava. Jau n’avev betg emblidà mia lingua materna! Ella era mo cupidada e stuvaiva vegnir svegliada» vegn el cità en La Quotidiana. Ils 18 da zercladur 2012 è cumparì ses cudesch biling puter-tudestg cun il titel Ova da savun/Seifenwasser.

Publicaziuns

• Ova da savun/Seifenwasser. Chasa Editura Rumantscha, Cuira 2012

Colliaziuns

• Martin Raschèr tar la Chasa Editura Rumantscha (rumantsch, era disponibel per tudestg)
• Istorgias chi vaun a cour en Engadiner Post/Posta Ladina dals 31.10.2012 (consultà ils 09.11.2012)
• Emprim cudesch da Martin Raschèr cun 92 onns, ils 25.10.2012 tar Radiotelevisiun Svizra Rumantscha (consultà ils 26.10.2012)
• In cudesch plain plaschair da vita – malgrà tut! en La Quotidiana dals 18.06.2012 (consultà ils 26.10.2012)
• Ein Buch voller Lebensfreude en Bündner Tagblatt dals 12.06.2012 (consultà ils 26.10.2012)