Philipp Melanchthon
|
Questa pagina è scritta en puter. |
Philipp Melanchthon, il nom da famiglia es greciso tenor l'üsaunza da quel temp, oriundamaing Philipp Schwartzerdt (* 16 da favrer 1497 a Bretten; † 19 d'avrigl 1560 a Wittenberg), d'eira ün umanist chi pigliaiva part a la refurmaziun. Sper Martin Luther d'eira'l la testa da la refurma da la baselgia in Germania. Pervi da sia furmaziun universela gniva'l nomno praeceptor Germaniae (in lingua latina per magister da la Germania).
Da natüra paschaivla e fich cultivo, pruvaiva Melanchthon adüna da fabricher punts e'ls mantegner traunter las confessiuns chi as fuormaivan düraunt ils ultims decennis da sia vita.
Pervi da sia paschaivlezza e prontezza da fer cumpromiss rendaiva'l critica veementa impustüt dals luterauns severs, dals uschedits gnesioluterauns (dal grec; voul dir ils vairs luterauns).
Ouvras
modifitgarLa scrittüra da confessiun la pü importanta da la baselgia luterana, la Confessio Augustana, es ün'ouvra da Philipp Melanchthon. Quist'ouvra gniva surdeda al imperatur Carl V. sülla radunanza da la dieta imperiela dal 1530.
Scu l'ouvra principela dogmatica da Melanchthon valan ils Loci communes rerum theologicarum (latin; per rumauntsch lös cumünels da las chosas teologicas) dal 1521. Els daron la basa futura per üna teologia sistematica dal protestantissem. Medemmamaing daune perdütta da la furmaziun classica scolastica da Melanchthon in definand tuottas chosas uschè exactamaing scu pussibel.