Radio Gherdëina Dolomites
Radio Gherdëina Dolomites (che s'identifitgescha per il solit sco Radio Gherdëina) è in emettur da radio ch'è naschì l'onn 1979 sin basa d'in project dad Ivo Walpoth, Arno Mahlknecht ed Oswald Rifesser. Dapi lura ha la direcziun midà pliras giadas. L'onn 1991 è l'emettur vegnì cumprà da la famiglia Franz Rabanser dad Urtijei che maina fin ussa la gronda famiglia radiofonica. Radio Gherdëina Dolomites è l'unic emettur da radio commerzial en la regiun ch'emetta numerusas emissiuns - tant live sco registradas - en lingua ladina da las Dolomitas.
Ins po retschaiver l'emettur en l'inter intschess ladin (Val Gherdeina, Val Badia, Val da Fascia, Fodom, Col ed Ampezo) sco era en la Val da l'Eisack, en la Val da Puster, a Bulsaun ed en la Bassa Sudtirolaisa, a Meraun e conturn, sco era sin la planira auta dal Schlern.
Radio Gherdëina Dolomites emetta da tuttas uras emissiuns da radio da divers tips ed operescha sco promotur da musica moderna e folcloristica ladina. Mintg'ura vegn emess il magazin d'infurmaziun da lingua tudestga Südtirol Journal, che vegn producì da l'agentura da pressa RMI da Bulsaun.
Ina retschertga che l'Institut da statistica da la provinza (ASTAT) ha fatg l'onn 2005 ha mussà che Radio Gherdëina Dolomites ha sulettamain en la Provinza da Balsaun (che cumpiglia be las valladas da Gherdeina e Badia) mintga di passa 13'000 auditurs e 25'000 auditurs mintg'emna.
Radio Gherdëina 2
modifitgarRadio Gherdëina 2 vegn emess be en Val Gherdeina sin la frequenza 88,8 MHz. L'emettur trasmetta da las 17.00 fin las 9.00 musica classica e surpiglia da di il program da Radio Gherdëina.[1]