Rudolf Bultmann

Questa pagina è scritta en puter.

Rudolf Karl Bultmann (* 20 d'avuost 1884 a Wiefelstede; † 30 da lügl 1976 a Marburg) d'eira ün teolog evangelic chi dvantaiva renomno in connex da sieu programm da la dischmitologisaziun (tudas-ch Entmythologisierung). Bgers da sieus scolars fundavain üna scoula da Bultmann chi vaiva grand'influenza i'l protestantissem da Germania zieva la seguonda guerra mundiela. Insembel cun Karl Barth faiva'l al principi dals ans da vainch la müdeda davent da la teologia liberela no a la teologia dialectica.

Dal 1921 fin a sieu pensiun faiva Bultmann da professur per il ram academic Nouv Testamaint a la faculted teologica a Marburg in Hessen.

Teologia

Bultmann chatta our cha'ls evangelis dal Nouv Testamaint consistan da bgeras funtaunas. Cotres fuonda'l la critica da fuorma scu üna disciplina fundamentela da la scienzcha dal Nouv Testamaint.

Gesu es per Bultmann da grand'importanza, ma sulettamaing scu il predgio e'l cret, na scu üna persuna istorica.

Citats

• Il vair sen dal mitus nun es quel da der ün sguard objectiv da muond; bgeraunz fo palais in el cu cha l'umaun s'inclegia a se svess in sieu muond; il mitus nu voul gnir interpreto cosmologicamaing, dimpersè antropologicamaing - meglder: in möd existentiel. Neues Testament und Mythologie (= Nouv testamaint e mitologia), 1941, S.22

• A nu's po druver glüsch electrica ed apparat da radio, fer adöver da mezs medicinels e clinics moderns e medemmamaing crajer i'l muond da spierts e da miraculs dal Nouv Testamaint. E chi managia ch'el poja que per sia persuna, sto as fer cler ch'el - sch'el declera que per la posiziun da la cretta cristiauna - fo malinclegiantaivla ed impussibla cun que la predgia cristiauna i'l temp preschaint. Neues Testament und Mythologie (= Nouv Testamaint e mitologia), 1941, S.18