Scola bilingua Cuira modifitgar

Dapi l'onn 2000/2001 datti ina Scola bilingua a Cuira. En duas chasas da scola vegnan manadas classas bilinguas talian/tudestgas e rumantsch grischun/tudestgas. Las classas rumantsch/tudestgas frequentan actualmain tranter 50 e 60 uffants.

Emprims pass modifitgar

In postulat da l'anteriura cussegliera communala Silva Semadeni cun la supplica da trair a niz la trilinguitad dal Grischun era en la citad da Cuira è vegnì acceptà e la citad da Cuira ha installà l'onn da scola 2000/2001 trais emprimas classas bilinguas.

Furma d'instrucziun modifitgar

Las classas vegnan instruidas mintgamai da dus scolasts/duas scolastas en job-sharing. Mintga scolast/scolasta instruescha ses roms en sia lingua. Actualmain vegnan tut las uras da matematica, insaquantas da realias, uras da lingua sco talas ed insaquantas uras da chant/da lavurs manualas/da gimnastica instruidas per rumantsch, respectiv talian.

Dumber da scolars e scolaras modifitgar

Las classas rumantsch/tudestgas dumbran actualmain 50 scolars e scolaras. La 4. e la 5avla classa e la 2. e 3. classa èn classas cumbinadas. La 1. classa dumbra actualmain mo 8 scolarets rumantschs. Ord quest motiv èn ils uffants rumantschs integrads en ina 1. classa regulara tudestga. 6 lecziuns ad emna vegnan els instruids separadamain en rumantsch grischun

Project modifitgar

La fasa da project terminescha cun l'onn da scola 05/06. Fin alura vegn il project accumpagnà ed evaluà scientificamain d'ina linguista da l'universitad da Berna. A la fin da mintga onn da scola han ils uffants da far in test da matematica e da lingua scritta e discurrida en rumantsch e tudestg. Cun quests tests vul ins garantir la cumpetenza linguistica e matematica dal singul uffant.

Facit modifitgar

L'evaluaziun dals tests fatgs ils davos onns han mussà ch'ils resultats èn absolutamain equivalents a quels da las classas monolinguas. L'uffant biling n'emprenda betg mo la materia dal rom, mabain sa perfecziunescha parallelamain en ina segunda lingua.