Trais Plaivs
Trais Plaivs (talian Tre Pievi) numn'ins ina cuntrada istorica che consistiva da las trais plaivs da Dongo, Gravedona e Sorico al Lai da Com superiur.
Dapi il temp medieval tard appartegneva il territori a la citad-stadi da Com ed è passà l'onn 1335 ensemen cun quella al Ducadi da Milaun. Las Trais Plaivs èn sa suttamessas l'onn 1512 a la regenza da las Trais Lias suenter che quellas han conquistà Clavenna, la Vuclina e Buorm dal Ducadi da Milaun. Las Trais Plaivs èn vegnidas administradas dad in podestat ch'è vegnì convocà spezialmain per ellas.
Suenter la disfatga da las truppas confederadas en la battaglia da Marignano l'onn 1515 èn las Trais Plaivs sa decleradas puspè sco part dal Ducadi da Milaun. Las Trais Lias n'han betg reconuschì questa decisiun ed han occupà il territori danovamain, n'han dentant betg pudì s'installar en la part meridiunala enturn a Dongo ed il chastè da Müsch. Perquai che il territori na vegn betg menziunà en la «Pasch perpetna» tranter la Frantscha e la Confederaziun, pretendeva il retg franzos en sia funcziun sco duca da Milaun dapi l'onn 1519 la restituziun dal territori dals Grischuns. Cur che la refurmaziun entschaveva a sa derasar en las Trais Lias, ha il prefect da Müsch nizzegià quai sco chaschun per occupar en in culp da surpraisa Sorico e Gravedona e spezialmain la zona da grond'impurtanza strategica tar la sbuccada dal flum Adda en il Lai da Com.
Perquai che ils chantuns catolics han refusà da gidar a las Trais Lias en quel conflict enconuschent sco Guerra da Müsch, han las Lias l'onn 1526 stuì renunziar definitivamain a las Trais Plaivs. Dapi lura ha il territori partì il destin dal Ducadi da Milaun.
