Utilisader:Andreas/Plazzals/Eyjafjallajökull
| Eyjafjallajökull | |
|---|---|
 Eyjafjallajökull | |
| Autezza | 1'666 m |
| Posiziun |  Islanda
|
| Chadaina | Eyjafjöll |
| Coordinatas | 63° 38′ 0″ n, 19° 36′ 0″ v |
| Tip | Stratovulcan |
| Vegliadetgna da la crappa | 700'000 onns |
| Davosa erupziun | 21 da mars 2010 |
| Primascensiun | 1794 per Sveinn Pálsson |
| Access tipic | dal pass Fimmvörðuháls |
 Gígjökull | |
L'Eyjafjallajökull [ˈɛɪjaˌfjatlaˌjœkʏtl] è in dals pli pitschens glatschers da l'Islanda. El è situà al nord da Skógar ed al vest dal pli grond Mýrdalsjökull en la vischnanca da Rangárþing eystra.
Sut il glatscher sa chatta in stratovulcan cun in'atgna chombra da magma.
Num
modifitgarIl num Eyjafjallajökull, per rumantsch glatscher da las muntognas da las inslas, deriva da si'approximitad a las Vestmannaeyjar (tud. Westmännerinseln). Questas inslas sa chattan var 10 km al sidost dal massiv muntagnard en l'Atlantic. Las pli pitschnas muntognas als pes da l'Eyjafjallajökull han num Eyjafjöll, q.v.d. las muntognas da las inslas.
Il glatscher
modifitgarIl chapitsch da glatsch ha ina surfatscha da var 78 km².[1].
Il piz il pli aut, che pizzan ora dal glatscher sco pitschens nunataks, è il Hámundur cun 1'666 m d'autezza.
Dal chapitsch da glatsch da l'Eyjafjallajökull van intginas glatschers da val e lieungas da glatscher fin a 1'000 m giu en las valladas.[2] Las pli impurtantas da quellas lieungas da glatscher èn il Steinholtsjökull ed il Gígjökull che s'extendan vers nord en direcziun dal current Markarfljót. Il num da la davosa lieunga da glatscher signifitga glatscher dal crater e deriva dal fatg che la lieunga da glatscher vegn dad ina sfessa en il crater dal piz. Gígur è il pled islandais per crater. La lieunga da glatscher stippa e sfendagliusa tanscha fin a 1'200 m giu en la val dal Markarfljót.
Als pes dal Gígjökull è sa furmà in lai glazial. Il lai glazial, numnà Lónið è circumdà da morenas autas. Il pitschen flum Jökulsá curra or dal lai en il current Markarfljót damanaivel.[3]
Il vulcan
modifitgarSut il chapitsch da glatsch pitschen sa chatta il vulcan da medem num.
Classificaziun dal vulcan
modifitgarIl vulcan appartegna a l'uschenumnada "zona vulcanica meridiunala" da l'Islanda.[4]
Ils vulcanologs n'èn betg perina davart la classificaziun dal vulcan. Þorleifur Einarsson al classifitgescha sco stratovulcan.[5] Thor Thordarson pleda dad in vulcan en furma d'in scut (Schildvulkan)[6] entant che Ari Trausti Guðmundsson descriva el sco "edifizi vulcanic planiv e lunghent".[7]
La caldera dal vulcan ha in diameter dad enturn trais fin a quatter kilometers. La seria da sfessas ch'appartegna al vulcan s'extenda cun ses craters per var 30 km dal vest vers l'ost.[8]
Intgins craters novs èn sa furmads il mars 2010 durant l'erupziun la pli recenta..[9]
Tips e vegliadetgna da la crappa
modifitgarLa crappa la pli veglia da l'Eyjafjallajökull exista da dapli che 800'000 fin 700'000 onns.
I sa tracta dad uschenumnada crappa transiziunala, basalts, ma era crappa differenziada ad in nivel pli aut.[10]
Istorgia d'erupziuns
modifitgarL'Eyjafjallajökull ha in'istorgia d'erupziuns da var 800'000 onns. Er en il temp suenter la colonisaziun, enturn l'onn 900 s.C., era el bainduras activ; el n'appartegna dentant betg als vulcans ils pli activs da l'Islanda.
Erupziuns preistoricas
modifitgarDurant il temp da glatsch sa laschan constatar dudesch fasas eruptivas, da las qualas tutgan sis a periodas interglazialas ed ulteriuras sis a periodas glazialas.
Durant la davosa èn sa furmads per exempel Hyaloklastite e lavas da plimatsch (Kissenlava, Pillowlava) che fan era part da l'edifizi vulcanic.
Durant las periodas libras da glatsch s'accumulavan las stresas da lava. Ellas èn per exempel vesaivlas en ils anteriurs spelms dal mar sin la vart meridiunala dal massiv.
Suenter il temp da glatsch avant enturn 10'000 onns han gì lieu duas erupziuns effusivas durant las qualas ils currents da lava da Hamragarður e Kamragil èn vegnidas producidas.[11]
Erupziuns istoricas
modifitgarBe quatter erupziuns enconuschentas èn succedidas dapi la colonisaziun da l'Islanda. L'emprima ha gì lieu l'onn 920,[12] la segunda il 1612/13. Da quest'erupziun è pauc enconuschent. En las Skarðsannalen vegn l'erupziun descrit uschia: „Da sprang plötzlich der Eyjafjallajökull an der Ostseite bis ins Meer vor, da kam Feuer hoch, das sah man fast überall nördlich von Land.“[13]
L'erupziun dals onns 1821-23
modifitgarLa penultima erupziun ha gì lieu tranter 1821 e 1823.[14] Durant questa èn vegnidas producidas 4 milliuns m³ tschendras da colur grisch stgir, a grauns fins e daciticas ch'ins chattà oravant tut en il sid da l'Islanda. Quest'erupziun plitost pitschna ha tuttina chaschunà tscherts donns. La tschendra era surtut ritg da fluor che nuscheva la biestga. Plinavant ha l'erupziun provocà jökulhlaups e quai surtut en il Markarfljót ma era en il flum Holtsá.
L'erupziun è entschetta ils 19 e 20 da december cun ina fasa explosiva che durava intgins dis e che ha gì plievgias da tschendra sco consequenza, surtut en ils territoris populads al sid e vest dal vulcan.
L'erupziun ha perdurà fin il zercladur da l'onn suandant ma senza esser percipida particularmain en ils abitadis cun excepziun dal livel da l'aua augmentà per exempel en il Markarfljót.
A partir da la fin dal 1822 hai dà in'autra fasa explosiva durant la quala las erupziuns explosivas avevan lieu en seria. L'erupziun ha tranter auter manà in nivel en autezzas considerablas. I ha dà giu tschendra en l'Eyjafjörður ma era sur Seltjarnarnes.
I para che l'erupziun era pli debla en il temp tranter avust e december. Tuttina è morta biestga en l'Eyjafjörður causa tissientada da fluor ed en la Holtsá han ins observà jökulhlaups. Era en il Markarfljót han ins constatà in jökulhlaup considerabel. Las funtaunas existentas na permettan betg dad eruir la data exacta.
L'onn 1823 èn intgins umens raivids sin l'Eyjafjallajökull per examinar ils craters minuziusamain. Els han chattà ina sfessa eruptiva in zichel al nordvest dal piz Guðnasteinn. Ils umens han temì che la muntogna possia rumper dapart perquai che la sfessa sa chattava en approximitad da l'ur dal piz e tranter ella ed il precipizi hai dà be ina paraid-crap satiglia.
Suenter las erupziuns han ins constatà che la muntogna è sa midada e ch'è sa furmada ina foppa enorma en la cuntrada sper il piz, nua ch'el pareva planiv ordavant.
La primavaira 1823 è il Katla en il Mýrdalsjökull rut ora ed a medem temp è puspè ascendì dapli vapur da l'Eyjafjallajökull, oravant tut ord la sfessa d'erupziun principala.
Erupziun dal 2010
modifitgar
Wikinews: Erupziun vulcanica: Proclamà stadi d'urgenza en l'Islanda – en las novitads (tudestg)
Ils 20 da mars è avant mesanotg entschetta la davosa erupziun dal vulcan.[15] Il lieu da l'erupziun sa chatta sin il pass Fimmvörðuháls tranter l'Eyjafjallajökull ed il Mýrdalsjökull.[16] La regiun cunfinanta, Fljótshlíð, e la costa meridiunala tranter Hvolvöllur e Vík í Mýrdal cun var 500 abitants è vegnida evacuada temporarmain.[17]
Indicaturs per in'erupziun
modifitgarEnturn Nadal 2009 è entschetta in fasa d'activitad seismica elevada en la zona da l'Eyjafjallajökull cun millis terratrembels pitschens, la pli gronda part d'ellas han cuntanschì ina magnituda tranter 1 e 2 e ch'han gì lur epicenter surtut en profunditads da 7 fin 10 km sut il vulcan.[18]
A partir da favrer 2010 han las mesiraziuns cun GPS mussà midadas evidentas a la surfatscha dal vulcan. Ils instruments èn vegnids postads da l'uffizi per meteorologia islandais e da l'Universitad da l'Islanda en numerusas lieus enturn il vulcan, p.ex. tar il bain puril Þorvaldseyri var 15 km al sidost dal lieu d'erupziun actual sin il Fimmvörðuháls. Durant l'evaluaziun dals resultats è sa demussada ina defurmaziun da la crusta da la terra da fin a 15 cm directamain sut il vulcan. Entaifer ils davos quatter dis avant l'erupziun è la crusta sa defurmada parzialmain per plirs centimeters.
Il dumber ordvart aut da terratrembels ensemen cun l'extensiun da la crusta rapida eran indicaturs per il fatg che magma ch'entrava sut la surfatscha da la terra.[19]
Las emnas suandantas è il dumber dals terratrembels mesirads s'augmentà anc dapli e ha cun 3'000 terratrembels ch'èn vegnids observads tranter ils 3 ed ils 5 da mars 2010 cuntanschì ina culminaziun mumentana. La pli gronda parts dals squass da la terra era relativamain debla (damain che magnituda 2), ma intginas eran pli intensivas che magnituda 2 ed eran perceptibel en ils lieus damanaivels.[20]
Ils 19 da mars è la seria da terratrembels sa spustada in zichel vers ost ed ensi (origins dals terratrembels a 4 fin 7 km da profunditad).
Ils 21 da mars han ins constatà in auter spustament vers ost ed ils origins dals terratrembels sa chattavan parzialmain en approximitad da la surfatscha da la terra.[21]
Entschatta da l'erupziun
modifitgarEnturn las 22.30 han ils apparats da mesirar registrà inquietezza debla e tremor vulcanic en trais lieus ch'èn en vischinanza immediata da l'Eyjafjallajökull. Enturn il medem temp è arrivada la nova che in'erupziun ha cumenzà sin il glatscher.[22] Pauc temp suenter èsi vegnì enconuschent ch'il lieu da l'erupziun sa chattava sin il pass Fimmvörðuháls tranter l'Eyjafjallajökull ed il Mýrdalsjökull.[23][24]
Ils geologs da l'Institut Meteorologic han reconstruì las vias d'ascensiun dal magma (cf. charta/colliaziun [7]).
Mesiras d'evacuaziun
modifitgarPer motivs da segirezza èn per il mument 500 persunas ord la vischinanza immediata dal vulcan en ils districts Fljótshlíð, Eyjafjöll e Landeyjar vegnidas evacuadas ed ils eroports da Reykjavík e Keflavík vegnids serrads a curt termin. La saira dals 21 da mars è l'eroport internaziunal dentant puspè vegnì dà liber per il traffic.[25][26][27]
Quasi tut ils abitants da la zona enturn il vulcan han pudì turnar en lur chasas ils 22 da mars 2010..[28] Las vias che mainan en la val [[Þórsmörk] e sin il pass Fimmvörðuháls èn anc serradas ils 27 da mars 2010.
Currents da lava durant ils emprims dis da l'erupziun
modifitgarI sa tractava fin ils 27 da mars 2010 surtut dad in erupziun effusiva ch'ha producì funtaunas da lava cun in'autezza da fin a 150 m d'autezza or da 10 fin 12 craters lung ina sfessa da var 500 m. La lava aveva ina temperatura da circa 1'000-1'200 °C ed era alcalica e bass viscosa.[29]
Las lavas luadas currivan per ca. 2 km vers nordost e suenter en la chavorgia Hrunagil nua ch'ella furmava ina cascada da lava da dapli che 200 m d'autezza.[30]
Ils 25 da mars 2010 èsi gartegià l'emprima giada als scienziads da vesair la furmaziun da pseudocraters.[31]
Durant ils emprims dus dis da l'erupziun è anc vegnida constatada in'expansiun da la crusta da la terra ch'è dentant chalada cun l'augmentaziun da l'activitad eruptiva. Ils scienziads pensan entant che l'input da magma en la chombra da magma equivala a l'output da magma tras il rumper ora e che l'erupziun ha cun quai cuntanschì in tschert equiliber.[32]
Il geofisicher Magnús Tumi Guðmundsson ha explitgà che l'erupziun haja gida ina dimensiun relativamain pitschna cumpareglià p.ex. cun l'erupziun da la Hekla l'onn 2000. Quai possia dentant sa midar sch'il center eruptiv sa spostia sut il glatscher. In tal spustament provocheschia in privel da jökulhlaups.[33] Ils radars da l'Uffizi da meteorologia islandais n'ha betg registrà plievgias da tschendra remartgablas. Pir la saira dals 22 da mars hai dà giu in pau tschendra a Fljótshlíð e Hvolsvöllur.[34]
La lava currenta è sa spartida ils 26 da mars. Ina gronda part ha furmà ina cascada da lava en la Hvannagil, ina chavorgia situada al nord da la Hrunagil.[35] Vers la saira dals 27 da mars ha in'autra part da las lavas sfratgà ora la paraid al sid dad in crater ed è sa muvida vers la senda da viandar da Skógar sin il Fimmvörðuháls ch'è vegnida serrada.[36]
La saira dals 28 da mars è sa furma in terz current che cula giu la chavorgia Hrunagil tranter ils auters dus. Il geolog Magnús Túmi Guðmundsson ha explitgà che la quantitad da lava n'haja betg sa reducida e ch'ella muntia a 20-30 m³/s.[37]
Nivels provocads da l'erupziun
modifitgarVers las 7.00 dals 22 da mars è in nivel provocà da l'erupziun ascendì dal lieu da l'erupziun fin in'autezza da 4'000 m.[38] Ils 23 da mars 2010 ha in tal nivel cuntanschì in'autezza da 7'000 m.[39]
Quantitad d'aua en ils flums
modifitgarIls 22 da mars è vers las 10.00 vegnì mesirà in augment da la quantitad d'aua e da la temperatura en il flum Krossá. Quai è vegnì attribuì a las activitads eruptivas damanaivlas.[40]
La sonda, ils 27 da mars 2010, è ina gruppda da geologs ida a far examinaziuns en la chavorgia Hrunagil en la quala entant entrava lava. L'aua dal pitschen flum Hrúná vapurava. Ils geologs han stimà la temperatura da l'aua a 50-60°. Ultra da quai han els presumà ch'i ha dà in jökulhlaup pitschen perquai ch'ins ha mesirà per in tschert temp ina quantitad d'aua augmentada.[41]
Crappa emessa e cuntegn da fluor
modifitgarL'analisa da tschendra vulcanica e lava dal lieu d'erupziun ha mussà in cuntegn da fluor da 104 mg fluorid per kg, ma las particlas da tschendra ch'è vegnidas catapultadas pli ensi pudain avair in cuntegn pli aut da fluorid (fin a 500 mg per kg). Perquai ch'il fluor en l'aua ed en il pavel ha in'influenza negativ sin l'utilisaziun da calzium èn ils purs en la cuntrada vegnids admonids da tegnair la biestga en la stalla e da dar ad ella bler'aua e pavel (frestgs).[42] L'economia purila è fitg impurtanta en il sid da l'Islanda nua che var 28 % dals lavurants èn emploiads sin bains purils.[43]
Connexiun tranter Eyjafjallajökull e Mýrdalsjökull
modifitgarTar las davosas duas erupziuns da l'Eyjafjallajökull en il 17avel e 19avel tschientaner han ins constatà che a medem temp u pauc suenter è era rut ora il vulcan Katla sut il Mýrdalsjökull. Ins presuma perquai ina connexiun tranter ils dus vulcans. Sin il Fimmvörðuháls (rum. "dies da muntogna dals tschintg umens da crap"), il pass tranter l'Eyjafjallajökull ed il Mýrdalsjökull, è en ils onns passads savens vegnida mesirada ina tscherta activitad seismica.
Il geofisicher Páll Einarsson renviescha al basegn dad observar minuziusamain il Katla, il vulcan sut il glatscher Mýrdalsjökull perquai che erupziuns da l'Eyjafjallajökull dal mars 2010 possia provocar in'autra erupziun dal Katla.[44]
Alpinissem sin l'Eyjafjallajökull
modifitgarI dat diversas pussaivladads d'ascender. Ari Trausti Guðmundsson descriva ina tura d'ascender davent da la pista Þórsmörk ord il NNW sur il Grýtutindur.[45] Plinavant maina ina senda dal pass Fimmvörðuháls sin il glatscher.
Eyjafjöll
modifitgarLa pli pitschnas muntognas che circumdeschan il vulcan glazial han num Eyjafjöll. L'ur da las muntognas Eyjafjöll, sin il qual il glatscher stat, era suenter la fin da l'ultima epoca glaziala avant var 10'000 onns la costa dal mar. Damai che la costa è sa spustada tschintg kilometers vers sid tras l'agiustament postglazial, èn restads enavos ils grips.
Els èn vesaivels particularmain cler sper las cascadas Skógafoss e Seljalandsfoss, ma era davent dal museum al liber da Skógar.
Cuvels
modifitgarEn il district sut las muntognas da las inslas (isl. undir Eyjafjöllum) datti era blers cuvels.
Il pli enconuschent da quels ha num Paradísarhellir (rum. cuvel-paradis). En il 19avel tschientaner saja el stà la scena dad in'istorgia d'amur captivanta. Davart questa ha il scriptur islandais Jón Trausti scrit il roman Anna von Stóra-Borg.
In auter cuvel damanaivel serviva da dieta districtuala regiunala (thing).
Þórsmörk
modifitgarTranter l'Eyjafjallajökull ed il Tindfjallajökull s'extenda la val Þórsmörk ch'è circumdada da trais glatschers. La val vegn serrada dal Mýrdalsjökull.
Vesair era
modifitgarLitteratura
modifitgar- Sturkell et al.: Katla and Eyjafjallajökull Volcanoes. Developments in Quaternary Science. Volume 13, 2010, Pages 5-21. (Springerlink)(englais)
- Hjaltadottir, S., K. S. Vogfjord and R. Slunga, 2009. Seismic signs of magma pathways through the crust at Eyjafjallajokull volcanoe, South Iceland, Icelandic Meteorological office report, VI 2009-013 (datoteca PDF)
- Hooper, A., R. Pedersen, F. Sigmundsson, Constraints on magma intrusion at Eyjafjallajökull and Katla volcanoes in Iceland, from time series SAR interferometry, In: The VOLUME project – Volcanoes: Understanding subsurface mass movement, eds. C. J. Bean, A. K. Braiden, I. Lokmer, F. Martini, G. S. O‘Brien, School of Geological Sciences, University College Dublin, p. 13-24, 2009
- Larsen, G., 1999. Gosið í Eyjafjallajökli 1821-1823 (The eruption of the Eyjafjallajökull volcano in 1821-1823). Science Institute Research Report RH-28-99. 13 p. Reykjavík. (datoteca PDF)
- Oskarsson, Birgir Vilhelm 2009. The Skerin ridge on Eyjafjallajökull, South Iceland: Morphology and magma-ice interaction in an ice-confined silicic fissure eruption. M.Sc. thesis, Faculty of Earth Sciences, University of Iceland. 111 p. (datoteca PDF)
- Pedersen, R., Freysteinn Sigmundsson and Páll Einarsson, 2007: Controlling factors on earthquake swarms associated with magmatic intrusions; Constraints from Iceland, Journal of Volcanology and Geothermal Research,162,73-80.
- Pedersen, R., Sigmundsson, F., Temporal development of the 1999 intrusive episode in the Eyjafjallajökull volcano, Iceland, derived from InSAR images, Bull. Volc., 68, 377-393, 2006.
- Pedersen, R., F. Sigmundsson,InSAR based sill model links spatially offset areas of deformation and seismicity for the 1994 unrest episode at Eyjafjallajökull volcano, Iceland, Geophys. Res. Lett., 31, L14610, doi:10.1029/2004GL020368, 2004. (online)
- Sigmundsson, F., Geirsson, H., Hooper, A. J., Hjaltadottir, S., Vogfjord, K. S., Sturkell, E. C., Pedersen, R., Pinel, V., Fabien, A., Einarsson, P. Gudmundsson, M. T., Ofeigsson, B., Feigl, K., Magma ascent at coupled volcanoes: Episodic magma injection at Katla and Eyjafjallajökull ice-covered volcanoes in Iceland and the onset of a new unrest episode in 2009, Eos Trans. AGU, 90(52), Fall Meet. Suppl., Abstract V32B-03
Referenzas
modifitgar- ↑ Vegahandbókin. Landmælingar Íslands, 2006, p. 135
- ↑ cf. Ari Trausti Guðmundsson: Land im Werden. Reykjavík, Vaka-Helgafell, 1996, p. 42
- ↑ Vegahandbókin. Landmælingar Íslands, 2006, p. 163
- ↑ Ari Trausti Guðmundsson: Lebende Erde. Facetten der Geologie Islands. Reykjavík, Mál og Menning, 2007 , p. 205
- ↑ Þorleifur Einarsson: Geology of Iceland. Rocks and landscape. 2005 (3), p. 70
- ↑ Thor Thordarson, Armann Hoskuldsson: Iceland, Classic Geology in Europe 3. Harpenden 2002, p. 98.
- ↑ Ari Trausti Guðmundsson: ibid., p. 204
- ↑ Ari Trausti Guðmundsson, ibid.
- ↑ vgl. Video sin la website da Morgunblaðið: http://www.mbl.is/mm/frettir/innlent/2010/03/24/hraunslettur_theytast_hatt/ , clamà ils 25.3.2010
- ↑ Ari Trausti Guðmundsson: ibid., p. 204 f.
- ↑ Thor Thordarson, Armann Hoskuldsson: Iceland. Classic Geology in Europe 3. Harpenden 2002, p. 98 s.
- ↑ Website dal Morgunblaðið, communicaziun dals 21 da mars 2010: „Þrisvar sinnum hefur gosið í Eyjafjallajökli á sögulegum tíma, þ.e. árið 920 …“ (clamà ils 21 da mars 2010)
- ↑ Translaziun propria da la Vichipedia tudestga, Text islandais: „Sprakk fram Eyjafjallajökull austur allt í sjó; kom þar upp eldur; hann sást nær alstaðar fyrir norðan land.“ „Land“ sa referescha qua a la cuntrada da Vík í Mýrdal fin a Kirkjubæjarklaustur, cf. era il num da la gruppa da craters Landbrótshólar.
- ↑ Descripziun tenor: Guðrún Larsen: Gósið í Eyjafjallajökli 1821. Stutt samantekt. 1999
- ↑ Uffizi meteorologic islandais: Eruption on Fimmvörðuháls; engl.; clamà ils 21 da mars 2010. Ausnahmezustand. Gletscher-Vulkan auf Island ausgebrochen; Communicaziun tar Spiegel-Online dlas 21 da mars 2010.
- ↑ Spiegel online: Island: Vulkanausbruch am Gletscher; clamà ils 21 da mars 2010.
- ↑ Communicaziun AFP tar Yahoo: 500 Menschen nach Vulkanausbruch auf Island in Sicherheit gebracht; clamà ils 21 da mars 2010.
- ↑ Veðurstofa Íslands (5 Mars 2010) Jarðskjálftahrina undir Eyjafjallajökli. En: Veðurstofa Ísland (The Meteorological Institute of Iceland).
- ↑ Morgublaðið (26 da favrer 2010) Innskot undir Eyjafjallajökli. En: Morgunblaðið.
- ↑ Model:Cite news
- ↑ Uffizi meteorologic islandais: http://www.vedur.is/skjalftar-og-eldgos/frodleikur/greinar/nr/1847 clamà ils 27.3.2010.
- ↑ Uffizi meteorologic islandais: http://www.vedur.is/skjalftar-og-eldgos/frodleikur/greinar/nr/1847 clamà ils 27.3.2010.
- ↑ Eldgosið á Fimmvörðuhálsi.
- ↑ Volcano Erupts Under Eyjafjallajökull Reykjavík Grapevine, clamà ils 21.3.2010
- ↑ Gos hafið í Eyjafjallajökli, Visir, 21.3.2010
- ↑ Volcanic eruption in Eyjafjallaglacier - flights to Iceland are on hold. Icelandair, clamà ils 21.3.2010.
- ↑ Fyrsta vél frá Boston í loftið klukkan hálf fimm. En: Vísir.
- ↑ Morgunblaðið 22. Mars 2010 Rýmingu aflétt. En: Morgunblaðið.
- ↑ Model:Cite news
- ↑ Morgunblaðið 22. March 2010 (13:11 GMT) Hraunflæði niður í Hrunagil. En: Morgunblaðið.
- ↑ Kvöldfréttir Stöðvar Tvö "Viðtal við Ármann Höskuldsson eldfjallafræðing" |work= Fréttastofa Stöðvar Tvö
- ↑ Veðurstofa Íslands (24 da mars 2010) GPS mælingar. En: Veðurstofa Íslands.
- ↑ Model:Cite news
- ↑ Eldgos í Eyjafjallajökli.
- ↑ cf. charta: Institut geologic, Universitad da l'Islanda: [1]
- ↑ vgl. website da la gesetta Morgunblaðið:ref=morenews clamà il 27 da mars 2010
- ↑ vgl. website da la gasetta Morgunblaðið:[2] clamà ils 28 da mars 2010
- ↑ Model:Cite news
- ↑ Ríkisútvarpið fréttavefur [3] Krafturinn ekki aukist]. En: RÚV.
- ↑ Meteorological Institute of Iceland: Eruption in Fimmvörðuháls mountain pass Elsdgosið í Fimmvörðuhálsi. En: Veðurstofa Ísland.
- ↑ Institut geologic, Universitad da l'Islanda: [4] (datoteca PDF) clamà ils 28.3.2010
- ↑ Institut geologic, Universitad da l'Islanda: [5]
- ↑ Landbúnaður skiptir máli. En: Bændasamtök Íslands.
- ↑ Website, Morgunblaðið: [6] (clamà ils 28 da mars 2010)
- ↑ Ari Trausti Guðmundsson: Íslensk fjöll. Reykjavík 2004, p. 58–59.