Utilisader:Andreas/Plazzals/Rudolf Lanz

Rudolf Lanz (era Rodolfo Lanz; * 23 da favrer 1854 a Beiva; † 24 da favrer 1927 a Beiva) è stà in magister, um politic e poet rumantsch. En si'ovra principala, Il Biviano, tract'el la tradiziun da sia patria en poesia e prosa.

Vita ed ovra

Rudolf Lanz è naschì ils 23 da favrer 1854 a Beiva. Suenter avair absolvì la scola prima primara da ses vitg natal, ha el frequentà per dus onns l'institut evangelic ad Aschera (Schiers). Silsuenter ha el fatg in emprendissadi sco pastizier en la renumnada pastizaria Klainguti a Genua, nua ch'el, tenor el giavisch dal bap, dueva sa preparar a la futura clamada. Damai che questa lavur n'ha al fatg cuntent, è el sa rendì l'onn suenter Cuira, nua ch'el ha frequentà dal 1875 fin al 1879 il Seminari scolastic.

Il medem onn è Lanz turnà a Beiva, nua ch'el ha dà scola durant diesch onns. En questa perioda ha el maridà Carolina Fasciati da Beiva e fundà cun ella sia famiglia. Il 1887 ha el edì l'emprima ediziun dal Biviano ch'era per diventar si'ovra litterara principala. Il 1889 ha Lanz calà da dar scola ed ha surpiglià per ina retscha d'onns l'administraziun d'in bain rural en la vischinanza da Modena en Italia. Là aveva el l'occasiun per sa perfecziunar en la lingua italiana ch'el discurriva e scriveva fluentamain.

Il 1890 l'ha dentant surventschì l'encreschadetgna e Lanz è turnà en patria. Là è el sa deditgà a l'agricultura ed è s'engaschà en la politica. Uschia era el actuar, cassier e mastral la cumin da Beiva, actuar, derschader, giudisch da pasch, president (1901/05) e deputà per la Tera da Surses e derschader districtual per il district da l'Alvra.

Litteratura

Andreia Grisch: President Rudolf Lanz. En: Annalas da la Societad Retorumantscha 42 (1928), p. 98–105

Colliaziuns

Andreas/Plazzals/Rudolf Lanz en il Lexicon istoric retic

Referenzas

Categoria:Poets rumantschs Categoria:Politicher Categoria:Beiva