Utilisader:D.Camenisch/Cudeschs/Balcan/Introducziun

Il Balcan è la peninsla che s'extenda tranter la Mar Adriatica e la Mar Naira vers sid. La regiun è segnada d'ina ritga cultura e da cuntradas da bellezza, ma er da la convivenza difficila tranter las singulas etnias. En il center da questa publicaziun stattan ils stadis ch'han fatg part en il 20avel tschientaner da la Jugoslavia (senza la Macedonia dal Nord). Igl èn quai la Slovenia, la Croazia, la Bosnia ed Erzegovina, la Serbia ed il Montenegro. En la segunda part (‹En il focus›) suondan ils artitgels da survista ‹Peninsla dal Balcan› e ‹Jugoslavia› ed a la fin da la publicaziun porschan intginas chartas ina survista davart la geografia e las citads principalas.

La versiun preschenta dal cudesch è vegnida preparada per la stampa l'avrigl 2020. Ulteriurs cudeschs da Vichipedia pronts per telechargiar sco e-book u per empustar sco cudesch stampà èn da chattar sut: https://rm.wikipedia.org/wiki/Wikipedia:Cudeschs.