Utilisader:D.Camenisch/Cudeschs/Dante e la Divina Commedia/Introducziun
Si'ovra principala, la ‹Divina Commedia›, ha Dante Alighieri (1265–1321) scrit durant ses onns d'exil a l'entschatta dal 14avel tschientaner (ca. 1307–1320). Ella vala sco crap da fundament dal talian sco lingua scritta e sco ovra poetica la pli impurtanta entaifer la litteratura taliana. E fin oz inspirescha quest'ovra ch'appartegna al canon da la litteratura mundiala a moda multifara tant la litteratura sco er bleras autras spartas culturalas e scienzas da l'art figurativ fin la filosofia.
La vita e l'operar da Dante crodan en il temp medieval tardiv (ca. 1250 fin 1500). Suenter la fin da la dinastia dals Staufers è quest'epoca stada segnada en l'Italia dal declin da la pussanza dal Sontg Imperi roman: al lieu dals regents tudestgs èn uss sa fatgas valair en l'Italia Superiura e Mesauna republicas citadinas, en il sid il stadi papal e la dinastia franzosa dals Anjou. Al plaun local han las partidas dals Guelfs (‹Welfen›) e Ghibellins (‹Waiblinger›) profità dal regress da la pussanza imperiala. Entant ch'ils Ghibellins sa basavan per ordinari pli ferm sin l'aristocrazia, eran ils Guelfs segnads d'ina tscherta vischinanza tar il ‹republicanissem› e vegnivan sustegnids da la baselgia, da la Frantscha e dals Anjou en lur cumbat cunter l'egemonia dals retgs tudestg-romans. La campagna taliana da Heinrich VII (1310–1313) – la finala invana – dueva esser la davosa emprova pli gronda da far valair envers las communas ed il papa ils dretgs imperials en l'Italia Mesauna e Superiura.
A Firenza fascheva da quel temp la famiglia da Dante part da la noblezza citadina che s'orientava politicamain als Guelfs. El è sez sa participà al cumbat da la defensiun burgaisa dals Guelfs en la Battaglia da Campaldino, en la quala ils Guelfs da Firenza han chaschunà ina greva sconfitta als Ghibellins ch'eran vegnids a la pussanza ils onns precedents ad Arezza e Pisa. Ils Guelfs eran ultra da quai dividids en ina fracziun ‹alva› (che vegniva manada a Firenza dals Cerchi; ella s'engaschava per l'autonomia da la citad envers il papa) ed ina ‹naira› (che vegniva manada a Firenza dals Donati).
Dal temp che Dante ha occupà ses uffizis politics a Firenza han ils eveniments prendì in svilup turbulent; entaifer la structura da partidas ch'era gia avant vaira cumplexa han gì lieu da quel temp spustaments ed ulteriuras separaziuns. La visita dal legat papal ha manà la stad 1300 a tumults. Dante e ses cunregents en il Priorat han bandischà – cunter la voluntad explicita dal legat – betg mo represchentants dals ‹alvs›, mabain er dals ‹nairs›. Sinaquai è la citad vegnida excommunitgada ed il papa ha clamà il 1301 Charles da Valois per restituir cun agid dals ‹nairs› la suveranitad papala. Ils ‹nairs› ch'èn penetrads cun el en la citad han prendì vendetga vi da lur inimis. Il mars 1302 è Dante vegnì sentenzià ensemen cun 14 ulteriurs ‹alvs› a la mort sin il stgandler per il cas ch'el returnass.
La ‹Divina Commedia› ha Dante scrit dal temp ch'el sa trategneva sco exilià en divers lieus da l'Italia dal Nord, surtut a Verona, Padua e Ravenna. Als eveniments politics da ses temp ha Dante prendì part vivamain er suenter si'exiliaziun. Uss però betg sco politicher activ, mabain en furma da brevs, scrittiras e poesias, cun las qualas el empruvava d'influenzar l'andament dals eveniments. Quest engaschament sa reflectescha er en la ‹Commedia› sezza, però betg en furma da commentaris areguard la politica actuala, mabain cun empruvar da descriver princips constitutivs per la convivenza umana en general. Per Dante ha quella da s'orientar al plan dal salit biblic ed a la raziunalitad filosofica.
Quest cudesch cumpiglia ils dus artitgels ‹Dante Alighieri› e ‹Divina Commedia› cuntegnids en la Vichipedia rumantscha. L'emprim tracta la vita ed ovra da l'autur e lur vasta influenza sin la posteritad. Il segund introducescha en la capodovra da Dante, preschenta il cuntegn da las trais parts (vul dir dal viadi tras ils trais reginavels da l'auter mund) e dat a la fin in sguard a la vasta recepziun da l'ovra, inclus diversas translaziuns parzialas en rumantsch.
La versiun preschenta dal cudesch è vegnida preparada per la stampa l'avust 2024. Ulteriurs cudeschs da Vichipedia pronts per telechargiar sco e-book u per empustar sco cudesch stampà èn da chattar sut: https://rm.wikipedia.org/wiki/Wikipedia:Cudeschs.