Utilisader:D.Camenisch/Cudeschs/Instruments a cordas/Introducziun

Tar instruments a cordas vegn il tun producì tras ina corda ch'è stendida tranter dus puncts. L'autezza dal tun dependa da la lunghezza da la corda, dal material (grossezza) da quella e da sia tensiun. Tut tenor co che la corda vegn messa en moviment, vul dir fatga vibrar, differenziesch'ins entaifer ils instruments a cordas tranter trais sutgruppas principalas: instruments da trair, ad artg e da batter.

En questa publicaziun vegnan purtretads mintgamai in dals instruments ils pli populars da mintga sutgruppa, numnadamain la ghitarra (instrument da trair), la violina (instrument ad artg) ed il clavazin (instrument da batter). L'artitgel introductiv ‹instruments a cordas› resumescha las caracteristicas da questa gruppa d'instruments ed enumerescha ulteriurs represchentants tipics, sper ils trais che vegnan tractads qua a fund.

La versiun preschenta dal cudesch è vegnida preparada per la stampa l'avrigl 2020. Ulteriurs cudeschs da Vichipedia pronts per telechargiar sco e-book u per empustar sco cudesch stampà èn da chattar sut: https://rm.wikipedia.org/wiki/Wikipedia:Cudeschs.