Utilisader:Mesoscaph/Cudeschs/Giats gronds selvadis/Caracal

Detagls interessants Cumpareglià cun auters giats da sia grondezza è il caracal il giat il pli svelt. Cumbain ch'el vegn magari, pervi da ses tschofs vi da las ureglias, numnà luf-tscherver dal desert u luf-tscherver african, n'è el nagin luf-tscherver. Caracals dumestis vegnan per part duvrads en l'India ed en l'Iran sco accumpagnaders da chatscha.

Territori da derasaziun dal caracal

Il caracal, er luf-tscherver persian, luf-tscherver african u luf-tscherver dal desert, è in giat da grondezza mesauna. L'animal sumeglia il luf-tscherver eurasian ed è er parentà cun quel. Ils caracals vegnan attribuids als giats pitschens, èn però ils pli grevs ed er ils pli svelts da tut ils giats pitschens.

Nua vivan caracals?

Caracals vivan en l'Africa ed Asia dal Vest. Lur spazi da viver cumpiglia steppas sitgas e mez deserts, ma er guauds, savannas e bostgaglia. Els vivan persuls u en pèrs en territoris marcads.

Co vesan els or?

Caracal durant ir a chatscha en la Serengeti

Caracals cuntanschan ina lunghezza da 65 cm, plus 30 cm lunghezza da la cua. Els possedan chommas pli lungas ed in corp pli magher ch'ils lufs-tschervers. La colur da lur pail po esser cotschen vin, grisch ubain sco il sablun. Giuvens caracals han flatgs cotschens sin la vart dal venter. Animals creschids n'han nagin dissegn dal pail, cun excepziun da flatgs nairs sur ils egls. Caracals han lungs tschofs nairs orasum las ureglias, quai che declera er l'origin da lur num – ‹karakulak›, tirc per ‹ureglias nairas›.

Tge maglian caracals e co tschiffan els lur preda?

Il caracal cun ses tschofs caracteristics

Caracals pon surviver lung temp senza baiver. Lur basegn d'aua cuvran els cun il nutriment. Els van per ordinari a chatscha la notg, la stagiun fraida però er durant il di. Lur preda sa cumpona surtut da ruiders e lieurs. Fitg darar attatgan els medemamain gazellas, pitschnas antilopas u giuvens struts.

Quai che pertutga lur nutriment, èn els vairs nas fins. Organs interns da mammals ch'els han tschiffà sbittan els. Per part stiran els davent il pail dad iraxs ed auters animals da preda ed eviteschan da magliar chavels. Da l'autra vart maglian els plimas d'utschels pitschens e na refusan er betg charn mez smarschida.

Caracals èn er buns raividers

Las ureglias da caracals vegnan dirigidas da 20 differents musculs. Ils tschofs da pail vi da las ureglias als gidan da localisar a moda precisa lur preda.

Animal giuven

Caracals pon siglir e raiver ordvart bain, quai ch'als pussibilitescha da tschiffar meglier che mintga auter carnivor iraxs. Il pli impressiunant è lur abilitad da far chatscha sin utschels. In caracal po tschiffar in utschè che sgola, magari al reusseschi er da tschiffar dapli che in a medem temp.