Utilisader:Mesoscaph/Cudeschs/Giats gronds selvadis/Giat da Pallas

Detagls interessants Ils giats da Pallas èn vegnids numnads tenor il scienzià Peter Pallas ch'als ha descrit sco emprim. Il giat da Pallas è la suletta spezia da giats viventa ch'ha pupillas radundas.

Territori da derasaziun dals giats da Pallas

Purtret d'in giat da Pallas

Sch'ins studegia, quant ditg ch'i dat gia in tschert gener da giats, alura è il giat da Pallas u manul la pli veglia spezia da giats vivents. Entras chats da fossils savain nus ch'il giat da Pallas viveva gia avant 10 milliuns onns sin terra. Pervi da ses chau extraordinari han ins pensà pli baud ch'els saja il perdavant dals giats persians odierns.

Nua vivan giats da Pallas?

Giats da Pallas vivan sin las planiras autas grippusas ed en la muntogna da l'Asia Centrala.

Tipic territori da derasaziun en la part centrala dal Himalaia

Co vesan giats da Pallas or?

In giat da Pallas che va a chatscha

La fatscha dal giat da Pallas sumeglia quella dal luf-tscherver. Il giat ha in corp grond e robust e chommas curtas. La colur dal pail lung, da saida variescha da grisch cler fin brin cotschnent. Il chau è curt e lad, cun egls gronds, radunds ed ureglias che stattan giu fitg. Il giat da Pallas ha en fatscha pizs alvs vi dals chavels, quai ch'al dat ina cumparsa bunamain sbrinzlanta. Giats da Pallas han lingias nairas sin las vistas e rintgs nairs sin ils lefs e vi da la cua. Il mintun ed il culiez èn alvs. La cumbinaziun da statura bratga e pail spess fan cumparair il giat da Pallas extraordinariamain plain e lomin.

Tge maglian giats da Pallas e co tschiffan els lur preda?

Giats da Pallas van la notg per terra en tschertga da pitschens mammals e fan chatscha sin utschels. Oravant tut emprovan els da tschiffar pikas; quai èn ruiders ch'èn parentads cun las lieurs, ma ch'han pitschnas ureglias radundas. Là nua ch'igl ha pikas en abundanza, na maglian giats da Pallas quasi nagut auter pli.