Utilisader:Mesoscaph/Cudeschs/Giats gronds selvadis/Giat selvadi

Detagls interessants I dat indizis ch'il giat selvadi african saja gia vegnì domesticà (tratg si sco animal da chasa) vers 7500-8000 a.C. Ins suppona ch'ils giats hajan tschertgà da sai anora la vischinanza dals umans e ch'els sajan ids en ils vitgs e citads a chatscha sin ratuns e mieurs. I vegn ad esser stà vaira d'engrà als umans ch'ils giats èn s'occupads da quests animalets mulestus che sa bittavan sin lur mangiativas e sin lur vanzadiras. Ils Vegls Egipzians veneravan ils giats sco dieus.

Territori da derasaziun da las trais sutspezias dals giats selvadis

Ils giats selvadis èn ils perdavants da noss giats da chasa. Els vivan però anc en cumpletta libertad. Igl existan trais sutspezias:

• il giat selvadi europeic vegn er numnà giat da guaud
• il giat selvadi african vegn er numnà giat da la Libia
• il giat selvadi asiatic vegn er numnà giat da la steppa

Nua vivan ils giats selvadis

Il giat selvadi europeic viva en ils guauds da l'Europa dal Vest, Centrala e da l'Ost sco er en Scozia ed en la Tirchia. Il giat selvadi african viva en deserts e savannas en l'Africa e sin la Peninsla Araba. Il giat selvadi asiatic viva surtut en ils deserts cun chaglias bassas da l'Asia Centrala.

Co vesan giats selvadis or?

Giat selvadi europeic

Giat selvadi african

Il giat selvadi europeic na sa lascha strusch scumbigliar cun in giat da chasa ordinari. Quel è numnadamain bler pli ferm ch'il giat da chasa ed er bler pli ferm che tut ils auters giats selvadis. Il pail spess e sia grondezza èn segns caracteristics. Il giat selvadi african ha pail pli curt ed il giat selvadi asiatic ha flatgs nairs u brin-cotschens pitschens, ma bain visibels.

Tge maglian giats selvadis e co tschiffan els lur preda?

Territori da derasaziun dal giat selvadi europeic

Lur nutriment consista surtut d'animals ruiders, cunigls, lieurs ed auters pitschens mammals. Sch'i sa porscha ina chaschun, fan els er chatscha sin pitschens utschels.

Co tiran giats selvadis si lur pitschens?

Giuven giat selvadi

Ils giattels selvadis europeics naschan la fin d'avrigl u il matg. Il letg po cumpigliar in fin otg giattels, per ordinari èn quai però dus fin quatter giattels. Quels daventan independents gia suenter quatter u tschintg mais ed èn creschids il pli tard suenter in onn.