Utilisader:Mesoscaph/Cudeschs/Giats gronds selvadis/Margai

Detagls interessants

Margais han ravels uschè flexibels ch'els pon raiver cun il chau ordavant da plantas giuador.
Margais pon pender vi d'ina chomma davos giu d'in rom e far schizunt en questa moda in pitschen cupid senza dar giu.
Margais pon siglir fin sis meters aut.

Margais èn veritabels artists da raiver. Els passentan la gronda part dal temp en las plantas. Là suondan els lur preda. Magari fan els en la roma in pitschen cupid pendend cun il chau engiu, sa tegnend be cun las griflas da las chommas davos. Il margai è er enconuschent sco Leopardus wiedii, ozolet da plantas, ozolet da muntogna, peludo ed en il territori da lingua englaisa ‹long tailed spotted cat›, quai che vul dir tant sco ‹giat da la cua lunga taclà›.

Nua vivan margais?

Ils margais vivan davent dal Mexico sur tut las ulteriuras regiuns da l'America Latina fin en il nord da l'Argentinia. Per ordinari èn els da chasa en ils guauds tropics.

Co vesan margais or?

In margai a Costa Rica

Il margai sumeglia uschè fitg l'ozelot ch'ins al numna er ozelot da plantas. Ma lur chau è in pau pli curt e radund. Ils egls èn fitg gronds per meglierar la vesida da notg. La cua è pli lunga che tar l'ozelot e dapli che dubel uschè lunga sco il corp. La cua lunga serva sco cuntrapais durant ballantschar. Il corp dal margai mesira ca. 62 fin 79 cm; quai è in pau damain che tar l'ozelot, persuenter èn las chommas pli lungas. Cun las chommas lungas pon els siglir fin 6 meters aut, quai è bler pli aut che lur parent l'ozelot! Els paisan tranter 2,5 e 5 kg e cuntanschan ina lunghezza da 80 fin 130 cm (cun cua). Ils mastgels èn savens in pau pli gronds e grevs che las femellas. Ils margais vegnan adina puspè scumbigliads cun lur proxims parents, l'ozelot ed il giat-tigher, damai ch'il muster dal pail è fitg sumegliant. Il pail dal margai è fitg spess, brin aurà cun flatgs nairs che pon sa sblatgir entamez (rosettas). Venter, pèz, gula e mintun èn clers fin alvs. Las ureglias portan flatgs alvs en furma d'egl sin la vart davos, la cua è cuverta cun flatgs u rintgs nairs.

Tge maglian margais e co tschiffan els lur preda?

Margais vivan quasi exclusivamain sin plantas. Els èn fitg buns raividers e sigliders e fan chatscha en las tschimas da las plantas sin utschels e schimgias. Las giugadiras dals pes davos èn uschè moviblas ch'els pon sco be paucas autras spezias da giats raiver sco stgilats cun il chau ordavant d'in bist giuador. Lur preda èn per ordinari auters mammals che vivan sin plantas sco stgilats, opossums, ratuns da plantas, pitschnas schimgias u smarschuns. Els maglian però er raunas da plantas, luschards ed utschels, magari er insects u schizunt fegls e fritgs. Els pon ir a chatscha da di e da notg.

Co tiran margais si lur giuvens?

Las femellas dals margais partureschan per il pli be in giattel, magari er schumelins. Ils giattels paisan tar lur naschientscha ca. 450 grams, in giat da chasa novnaschì paisa per exempel be ca. 100 grams. Il giattel ha tar la naschientscha in muster regular da flatgs nairs, survegn l'emprim nutriment cumpact suenter ca. 40 dis ed è creschì suenter otg fin diesch mais. Margais che vivan en fermanza pon cuntanscher ina vegliadetgna da fin 18 onns.