Utilisader:Mesoscaph/Cudeschs/Linguas dal mund/Hindi

Nua discurran ins hindi e quantas persunas discurran questa lingua?

Hindi è surtut derasà en l'India dal Nord

La gronda part da las persunas che discurran hindi vivan en l'India (surtut en il nord dal pajais) u en il Nepal. Ma bleras dad ellas èn er emigradas en auters pajais, uschia ch'i dat en il fratemp sin l'entir mund umans che discurran hindi (p.ex. en l'Africa dal Sid, la Gronda Britannia, Mauritius, Jemen, Uganda u en ils Stadis Unids da l'America).

En tut il mund discurran tranter 340 e 500 milliuns umans hindi, tut tenor sch'ins quinta er dialects e linguas parentadas u betg. Ultra da quai è il hindi parentà fitg stretg cun ina lingua cun num urdu ch'è medemamain derasada vastamain en l'India dal Nord. Perquai po ina persuna che discurra hindi er sa conversar cun ils 60 fin 100 milliuns pledaders dad urdu, senza ch'in u l'auter avess d'emprender ina nova lingua.

Tge scrittira dovra questa lingua?

La scrittira devanagari en il mintgadi (en la citad Varansi en l'India dal Nord)

Per scriver hindi vegn duvrada la scrittira devanagari. Igl è quai ina da las pli veglias scrittiras dal mund (sper marathi). Il sanscrit è stà l'emprima lingua ch'ha duvrà quests segns. Sur lung temp è il sanscrit stà ina lingua che vegniva be discurrida. Cur ch'ins ha alura cumenzà a scriver sanscrit, èn l'emprim stads en diever auters segns, fin ch'il devanagari è daventà la scrittira normala dal sanscrit. La lingua vegn scritta da sanestra a dretga; mintga segn correspunda ad in sun.

Tge savain nus davart l'istorgia da questa lingua?

Il hindi deriva dal sanscrit. Questa veglia scrittira era bler memia cumplitgada per la simpla glieud ed è perquai sa transfurmada sur ils tschientaners en il prakrit. Quel è puspè sa midà, e vers 1000 s.C. èn sa sviluppads ils dialects e las linguas che vegnan discurrids oz en l'India dal Nord, tranter quellas er hindi. Pli tard han ils Persians regì en l'India dal Nord, e perquai posseda il hindi er intgins pleds esters persians ed arabs.

In dals pli enconuschents poets dal hindi è Tulsidas (1532–1623). El ha scrit dudesch cudeschs, tuts en furma da vers, pia sco tar poesias. Quai era usità da lez temp tar texts hindics.

In ulteriur enconuschent autur da l'India è Premchand (1880–1936). El vala sco impurtant represchentant da la litteratura da hindi ed urdu moderna.

Tge locuziuns pudessan esser utilas en questa lingua?

I suondan intginas simplas frasas en hindi. Hai in stritg sur a, i ni u, è il bustab da pronunziar lung. Hai sut in d ubain t in punct, alura stos ti tutgar en quest lieu cun la lieunga il tschiel da la bucca.

नमस्ते – Namaste – Hallo ni A revair

आप कैसे हैं ? – Āp kaise hain? – Co vai cun Vus?

मैं ठीक हूँ, और आप ? – Main ṭhīk hūn, aur āp? – Cun mai vai bain, e cun Vus?

आपका नाम क्या है ? – Āpkā nāmkyā hai? – Co avais Vus num?

मेरा नाम सुनील है – Merā nām Sunil hai – Jau hai num Sunil

Tar l'ultima frasa stos ti far attenziun. Ils pleds stattan numnadamain en in'autra successiun che tar nus. Translatà pled per pled sa cloma la frasa: «Mes num Sunil è.» Vul in European discurrer hindi, sto el far vaira attenziun a la successiun dals pleds.

Las cifras en hindi

शून्य – sūnya – ० – 0

एक – ek – १ – 1

दो – do – २ – 2

तिन – tin – ३ – 3

चार – cār – ४ – 4

पाँच – pāñc – ५ – 5

छः – chaḥ – ६ – 6

सात – sāt – ७ – 7

आठ – āṭh – ८ – 8

नौ – nau – ९ – 9

दस – das – १० – 10

Ina simpla poesia en hindi

Devanagari

मछली जल की रानी है,

जीवन उसका पानी है,

हाथ लगाओतो ये डर जाएगी,

बाहर निकालो तो ये मर जाएगी।

Pronunzia

Machlī jal kī rānī hai,

jīvan uskā pānī hai,

hāth lagāo to ye ḍar jāegī,

bāhar nikālo to ye mar jāegi.

Translaziun

Il pesch è il retg da l'aua

Sia vita è l'aua

Tutgas ti el cun tes maun, vegn el a sa spaventar

Prendas ti or el, vegn el a murir.