Utilisader:Mesoscaph/Cudeschs/Noss sistem solar/Prefaziun
VICHIPEDIA JUNIOR è ina retscha da cudeschs tematics che sa drizza ad uffants da ca. 10 onns ensi (stgalim mesaun resp. 2. ciclus tenor il Plan d'instrucziun 21). Ils texts derivan da Wikijunior ubain dal lexicon d'uffants Klexikon. En ina lingua bain chapibla dat la retscha invista en tematicas multifaras (natira, istorgia, geografia, uman e societad e.a.) – per a chasa u en scola, per stampar u duvrar online.
Quest cudesch ta prenda cun sai sin in viadi mirveglius tras noss sistem solar. El sa cumpona da duas parts:
- En la part generala vegn l'emprim dà ina survista da quai che sa preschenta al tschiel (‹Tge è tge al firmament?›), pia er cun guardar sur noss sistem solar or sin stailas e galaxias. Er il segund chapitel tracta l'univers en general e tematisescha ‹Co che nus mesirain e perscrutain l'univers›. En il chapitel final da la part generala vegn alura preschentà ‹Il sistem solar en survista› e s'approfundà en las suandantas dumondas: Tge tegna ensemen il sistem solar? Co è il sistem solar sa furmà? Tge capita cun noss sistem solar?
- La segunda part tracta ils singuls corps celests ch'èn da chattar en noss sistem solar. Sper il sulegl èn quai ils otg planets, la tschinta d'asteroids, planets nanins, comets, la tschinta da Kuiper ed il nivel d'Oort. Er a nossa glina è deditgà in chapitel per sasez; las ulteriuras glinas vegnan tematisadas en ils chapitels dals planets respectivs.
Questa publicaziun ta duaja gidar a respunder las dumondas multifaras che sa tschentan cun guardar sin tschiel. I dat bler da scuvrir, chaussas dal tuttafatg novas, ma er da quellas che ti enconuschas forsa gia, cun infurmaziuns supplementaras. Bun divertiment cun sfegliar!
La versiun preschenta dal cudesch è vegnida preparada per la stampa il november 2021. Ulteriurs cudeschs da Vichipedia pronts per telechargiar sco e-book u per empustar sco cudesch stampà èn da chattar sut: https://rm.wikipedia.org/wiki/Wikipedia:Cudeschs.
