Utilisader:TranslaTeam/Cudeschs/L'Amazona svizra/Introducziun

Regula Engel-Egli è naschida l'onn 1761 a Fluntern (oz vischnanca politica da Turitg). Ses bab, in anteriur uffizier en l'armada prussiana, ha sa laschà sparter da sia dunna trais onns suenter la naschientscha da la figlia. Quella è l'emprim stada tar il bab a Turitg ed è pli tard sa rendida tar la mamma a Cuira. L'onn 1778 ha ella maridà Florian Engel da Langwies, in uffizier grischun en servetsch franzos.

Durant pli che 20 onns ha Regula Engel accumpagnà ses um sin sias campagnas militaras tras l'entira Europa ed en l'Egipta. Ella è daventada mamma da 21 uffants ed ha savens er sezza cumbattì sin il champ da battaglia. En la Battaglia da Waterloo il 1815 èn crudads ses um e dus figls; ella sezza ha survivì grev blessada. En tschertga da ses uffants ha ella sinaquai fatg viadis en ils Stadis Unids, en l'Engalterra ed en l'Italia.

Suenter ses return en Svizra era ella en difficultads finanzialas e dependenta da parents ed enconuschents. Per pudair gudagnar ses da viver ha ella publitgà il 1821 sias regurdanzas. L'ovra è sa vendida bain ed è cumparida il 1825 en ina segund'ediziun. L'onn 1827 ha l'autura ultra da quai scrit ina cuntinuaziun da si'istorgia da la vita, la quala è vegnida stampada il 1828. Questa segunda part tracta da sias stentas – la finala vanas – d'obtegnair bunificaziuns e pensiuns a basa da l'engaschament militar da ses um. Malgrà las bunas cifras da vendita da sia biografia, ha l'autura passentà la saira da la vita en relaziuns plitost povras. Ella è morta il 1853 en l'auta vegliadetgna da 92 onns en in ospital a Turitg.

Si'ovra furma ina da las autobiografias da dunnas las pli originalas dal 19avel tschientaner. Quella porscha – betg darar cun fin umor – la descripziun da la vita d'ina dunna vitala, inschignusa e curaschusa, la quala n'ha er naginas resalvas da s'exprimer davart l'armada da Napoleun ubain la situaziun en Svizra.

Questa publicaziun sa cumpona da duas secziuns, numnadamain da la part editoriala che preschenta l'autobiografia dad Engel-Egli – tenor l'ediziun dal 1825, translatada a moda integrala – e da las materialias che consistan da l'artitgel da Vichipedia ‹Regula Engel-Egli›. La versiun preschenta dal cudesch è vegnida preparada per la stampa il mars 2021. Maletg da cuverta (simbolic): Augusto Ferrer-Dalmau (2012). Ulteriurs cudeschs da Vichipedia pronts per telechargiar sco e-book u per empustar sco cudesch stampà èn da chattar sut: https://rm.wikipedia.org/wiki/Wikipedia:Cudeschs.