Utilisader:TranslaTeam/Cudeschs/La guerra dals munds/Introducziun
Il roman ‹The War of the Worlds› è cumparì oriundamain l'onn 1898. I sa tracta d'ina da las ovras-clav che duevan fullar via al gener science fiction. Ma il cuntegn da quella na sa lascha tuttavia betg reducir a la confruntaziun fictiva tranter terresters ed aliens. Anzi tracta l'autur tranter las lingias er dumondas dal progress uman sfranà e crititgescha indirectamain il colonialissem ed imperialissem che sa chattavan da quel temp sin il zenit.
Co che l'ovra dueva porscher er pli tard ina surfatscha da projecziun per da tuttas sorts temas collectivas, mussan a moda impressiunanta las adattaziuns radiofonicas dad Orson Welles (1938) e la versiun emessa il 1949 a Quito (Ecuador); quest'ultima gioga sapientivamain cun il gieu da pleds ‹Marsistas› – ‹Marxistas› e dueva manar ad ina panica da massa (cf. las materialias a la fin da questa publicaziun).
Almain uschè enconuschenta sco l'ovra sezza èn ozendi las numerusas adattaziuns cinematograficas da quella. Sper il classicher da l'onn 1954 (reschia Byron Haskin) sajan menziunadas las duas versiuns cumparidas il 2005: Entant che reschissur Timothy Hines ha filmà lez onn il cudesch da Wells a moda uschè autentica sco pussaivel, transferescha Steven Spielberg ils schabetgs en il 21avel tschientaner (rolla principala: Tom Cruise).
L'autur H.G. Wells (1866–1946) è creschì si ed ha vivì a Londra, pia al lieu d'acziun da ‹La guerra dals munds›. Suenter avair studegià scienzas natiralas ha el, cun stgars 30 onns, cumenzà a sa deditgar adina dapli a la professiun da scriptur. Sias ovras las pli enconuschentas èn ils dus classichers dal gener science fiction ‹The Time Machine› (1895) e ‹The War of the Worlds› (1898).
Questa publicaziun sa cumpona da duas parts: La translaziun integrala da ‹La guerra dals munds› e las materialias ch'approfundeschan singuls aspects da l'ovra e porschan ina biografia cumplessiva da l'autur. ‹La guerra dals munds› è – confurm a l'original – sutdividì en duas parts: ‹La vegnida dals Marsians› (17 chapitels) e ‹La Terra sut ils Marsians› (9 chapitels + epilog).
La versiun preschenta dal cudesch è vegnida preparada per la stampa l'avust 2021. Ulteriurs cudeschs da Vichipedia pronts per telechargiar sco e-book u per empustar sco cudesch stampà èn da chattar sut: https://rm.wikipedia.org/wiki/Wikipedia:Cudeschs.
