Utilisader:TranslaTeam/Cudeschs/Scrit en il sablun/Introducziun
Kahlil Gibran (* 6 da schaner 1883 a Bischarri, Imperi osmanic, oz Libanon; † 10 d'avrigl 1931 a New York City) è stà in pictur artist, filosof e poet libanais-american. Schebain naschì sco cristian (maronit), è si'ovra er influenzada fermamain dal bahaissem e da l'islam (surtut da la mistica dals sufis) e vala sco punt tranter il mund arab ed il cristianissem. Famus è Gibran daventà surtut cun ‹The Prophet› (‹Il profet›) ch'è cumparì il 1923 en englais ed è vegnì translatà en uschè bleras linguas sco be paucas autras ovras da la litteratura mundiala.
Ils motivs centrals dals texts plitost curts – nudads per il pli en furma da sabientschas e sentenzas – furman la vita, l'amur e la mort. Savens tracta l'autur questas ed autras tematicas fundamentalas da l'existenza umana a moda nunspetgada, surprendenta – e lascha la finala enavos la lectura/il lectur tant perplex sco enritgì.
Questa publicaziun preschenta intgins dals texts principals da Kahlil Gibran e porscha a la fin ina curta biografia da l'autur. Las singulas ovras – cumparidas oriundamain per part en arab, per part en englais – èn integradas qua en successiun cronologica (I: ovra integrala; ulteriuras ovras: excerpts):
- Ina larma ed in surrir (1914, arab)
- Il nar (1918, englais) I
- Ils stemprads (1920, arab)
- L'annunziader (1920, englais)
- Terra ed olma (1923, arab)
- Il profet (1923, englais) I
- Sablun e stgima (1926, englais)
- Il viandant (postum 1932, englais)
La versiun preschenta dal cudesch è vegnida preparada per la stampa il zercladur 2021. Cuverta: Collascha da la suttascripziun araba ed englaisa da l'autur. Ulteriurs cudeschs da Vichipedia pronts per telechargiar sco e-book u per empustar sco cudesch stampà èn da chattar sut: https://rm.wikipedia.org/wiki/Wikipedia:Cudeschs.
