Pugaus

Pugaus, en documents pli vegls per regla numnà Arpagaus, è in anteriur vitg sin l'intschess dal vitg da Dardin. El appartegna a la vischnanca grischuna da Breil.

Caplutta da Sontgaclau, il sanctuari d'ina anteriura fracziun dal vitg da Dardin

Istorgia

En il temp medieval fin a la fin dal 18avel tschientaner sa chattava Pugaus en vischinanza directa da la via da communicaziun sursilvana che passava da Glion sur Rueun, Vuorz, Breil a Schlans vers il Pass Lucmagn, ch'era da quel temp in pass fitg frequentà. Da quel temp furmava Pugaus la part principala dal vitg da Dardin e disponiva sco emprim dals aclauns da Dardin in'agen sanctuari, la Caplutta da Sontgaclau che sa chatta anc oz en la vischinanza da l'anteriur vitg.

Documentadas èn era duas undas da la pestilenza che han decimà la populaziun da Pugaus en l'emprima mesadad dal 17avel tschientaner. La tradiziun populara pretenda che la pestilenza haja manà a l'abandun dal vitg enturn 1800. Oz èn ins plitost da l'avis che la construcziun da la via da communicaziun en il fund da la val tranter Rueun e Trun haja isolà la culegna cunquai ch'il traffic da persunas e rauba na passava betg pli sper il vitg. Uschia vegnan ils davos abitants ad avair bandunà il vitg per sa domiciliar en ils aclauns pli bass en la vischinanza da la baselgia parochiala S.Bistgaun ch'è vegnida construida vers la fin dal 17avel tschientaner a Caprè.