Bianca Mayer
|
Questa pagina è scritta en vallader. |
Bianca Mayer (* 17. mai 1979 a Scuol) es üna musicra rumantscha. Sco chantadura lavur'la suot il pseudonim Bibi Vaplan.
Vita
modifitgarBianca Mayer es nada a Scuol dal 1979 e creschiva sü in üna famiglia musicala. Seis bap Reto Mayer d'eira musicant popular e dirigent.[1][2]
Bianca Mayer ha stübgià clavazin classic a la Scoula ota zürigaisa dals arts ed ha tut eir cuors da jazz dürant quel temp.[3]
Dal 2008 es ella tuornada in Engiadina, ha vivü fin il 2012 ad Ardez e lavurà pro la Scoula da musica Engiadina Bassa / Val Müstair.[2]
Dal 2012 fin 2014 ha ella lavurà sco moderatura al Radio Rumantsch a Cuoira.[1]
Daspö il 2014 lavura Bianca Mayer sco musicista independenta suot il nom Bibi Vaplan.
Musica
modifitgarMusica da film e teater
modifitgarDaspö 2003 scriva Bianca Mayer cumposiziuns per teaters e films, desch progets pür dal 2004 fin il 2008. Ella ha assisti da cumpuoner il soundtrack dal film Vitus da Fredi Murer (2005), il soundtrack dad I was a Swiss Banker da Thomas Imbach (2007) sco eir quel da Happy New Year da Christoph Schaub (2008).[4][2]
Alba da la Clozza
modifitgarDavo il stüdi e fin 2009 d'eira Bianca Mayer chantadura da rock aint illa gruppa Alba da la Clozza, provocativa, cun chavels cuorts e blondats, sunond la guitarra da jazz.[1]
Bibi Vaplan
modifitgarDaspö il 2010 sviluppaiva Bianca Mayer ün stil da musica plü quiet e pensiv.[5] Ella cumanzaiva a publichar sia musica suot il pseudonim Bibi Vaplan, ün nom chi dess esser program (Bianca, va plan!). Sco Bibi Vaplan scriv'la ils texts e la musica, chanta e suna il clavazin o eir il cembalo.[1] L'album Sdruagliar dals 2012 es üna collavuraziun culla Kammerphilharmonie Grischun.[5][6]
Las chanzuns da Bianca Mayer sun adüna per vallader.[1] Sur dal motiv persunal da far musica disch la chantautura:
«La musica am güda da mütschir, d'incleger, sentir o da chattar darcheu il fuond suot ils peis cur ch'eu am perd aint in alch. Sch'eu füss cuntaintischma, nu stessa far musica, lura gessi a baiver ün caffe cun meis amis.»
Discografia
modifitgar- Üna jada intuorn sco Alba da la Clozza, 2009.
- Ingio vasch? sco Bibi Vaplan, 2011.
- Eu vegn cun tai sco Bibi Vaplan, 2011.
- Sdruogliar sco Bibi Vaplan, 2012.
- Cul vent sco Bibi Vaplan, 2015.
- Cler Cler sco Bibi Vaplan, 2018.
Premi
modifitgar- 2009 premi da promoziun dal chantun Grischun[4]
- 2014 premi per lavur proffessiunala chantun Grischun
- 2015 premi per lavur proffessiunala chantun Grischun
- 2018 1.premi «Charta d'amur» Aris Verlag
- 2019 premi da promoziun dal chantun Zug
- 2019 Nominaziun musicista da l'on (Bündner Music Awards)
- 2019 Nominaziun Swiss Live Talents «National Language»
Colliaziuns
modifitgarIndicaziuns da las funtanas
modifitgar- ↑ 1,0 1,1 1,2 1,3 1,4 Schweizer Radio und Fernsehen, emissiun Kulturplatz dals 17. lügl 2013. Visita als 2. settember 2013.
- ↑ 2,0 2,1 2,2 Cuors da la vita, inedi, com. pers. als 3. settember 2013.
- ↑ Biografia sün mx3 (The Swiss Music Portal). Visita als 2. settember 2013.
- ↑ 4,0 4,1 Radiotelevisiun Svizra Rumantscha: emissiun da 2009. Visita als 2. settember 2013.
- ↑ 5,0 5,1 Artichel da la Posta Ladina als 15 november 2012. Visita als 2. settember 2013.
- ↑ Infuormaziun biografica pro Giuventüna Rumantscha. Visita als 2. settember 2013.