Chor da Mats da Basilea
|
Questa pagina è scritta en vallader. |
Il Chor da Mats da Basilea e ün chor da e per giuvenils masculins. È fundà in 1927 e conduì da Markus Teutschbein. L'on 2007 ha il chor pudü festagiar seis 80 avel anniversari. Il chor, hoz confessiunalmaing masdà, provegn dal chor Mats chantaduors da la baselgia evangelica refuormada da la cità da Basilea.
Il chor chanta ouvras spiritualas e secularas dal renaschimaint fin al temp modern. I vain chantà a-cappella, cun accumpagnamaint d'orchester o eir insembel cun solists instrumentals.
Ils ultims ons sun gnüdas rapreschantadas tanter oter las seguaintas ouvras cun orchester: l'Oratori da Nadal da Johann Sebastian Bach, ils oratoris Paulus e Elias da Felix Mendelssohn Bartholdy, la Cantata da Son Niclà da Benjamin Britten, ed il Messias da Georg Friedrich Händel.
Il chor organisescha agens concerts, cooperescha in serias da concerts existents e segua ad invids per concerts in Svizra ed a l'ester (Maastricht, Son Petersburg, New York, Philadelphia, Vienna, Rio de Janeiro, Venezia e Sofia) ed ella piglia part sco giast a festivals (per part fingià plüssa jadas), sco per exaimpel a las Eivnas festivas da musica da Lucerna, al Festival de Nantes, ed al Festival Europeic dals Chors da Giuvenils. Il chor metta eir a disposiziun guivens solists per rapreschantaziuns d'operas in differentas chasas d'opera (Basilea, Berna, Freiburg en Br.) e per oratoris.
Il chor chanta regularmaing e chaschun da cults divins a differentas confessiuns sco eir pro differentas ocurrenzas ecclesiasticas e secularas. Sco ulteriuras activitats as po nomnar producziuns a la televisiun ed al radio e registraziuns da CD/MC in Svizra ed a l'ester.
A la buna instrucziun musicala vain dat ün grond pais. Quist'instrucziun po cumanzar fingià cun ca. ses ons a chaschun d'ün prüm cuors da preparaziun, o cun ot ons i'l cuors da basa. Davo ün temp sco ospitant vain il giuven chantadur integrà i'l chor cun ca. desch ons. L'instrucziun e'l perfecziunamaint es aint ils mans da persunas cumpetentas e cumprovadas.