Georg Fient
Georg Fient (* 30 d'avrigl 1845 a Pany, vischnanca da Luzein; † 5 da settember 1915 a Cuira, refurmà, burgais da Luzein) è stà in politicher, scriptur e publicist svizzer.
Vita e carriera politica modifitgar
Georg Fient è naschì l'onn 1845 a Pany en la vischnanca da Luzein en il Partenz. El ha frequentà la scola primara a Luzein e suenter il seminari scolastic a Cuira, ch'el ha bandunà cun il diplom da magister. En quella funcziun ha el lavura l'emprim a Trin, pli tard ad Eichberg en il chantun Son Gagl e lura a Küblis-Davlazza, nua ch'el ha dirigì l'emprima scola reala dal lieu. Silsuenter è el vegnì elegì sco magister a la Musterschule a Cuira.
Il 1881 è Fient entrà en la politica. Da quel on fin il 1891 era el secretari da la Regenza e lura fin il 1912 directur da la Chanzlia chantunala. Or da motivs da sanadad è el sa retratg en quel onn ed ha passentà anc trais onns en greva malsogna. Georg Fient è mort l'entschatta da settember 1915 en la vegliadetgna da 70 onns a Cuira.
Il publicist e scriptur modifitgar
Dasper si'activitad politica è Georg Fient sa profilà sco scriptur e publicist. Er en quest'ultima funcziun ha el gì grond'influenza sin la politica chantunala.
En ils onns 1880 è Fient stà redactur dal Bündner Volksblatt, il 1901 ha el surpiglià la redacziun da la Prättigauer Zeitung nov fundada (oz Prättigauer und Herrschäftler) ed il 1905 quella dal Graubündner General-Anzeiger.
Sco scriptur è Georg Fient vegnì popular cun las monografias Das Prättigau e Das St. Antöniertal ma era cun toms da raquints sco Ernstes und Heiteres, Winter- und Frühlingsblumen e particularmain cun sias Lustig G’schichtenä dal 1898.
Litteratura modifitgar
Georg Fient en il Lexicon istoric retic- Necrolog senza titel en il Fögl d'Engiadina da sonda, 11 da settember 1915
