Gustaf Wingren

Questa pagina è scritta en vallader.

Gustaf Wingren (* nat als 29 da november 1910 a Tryserum, Östergötland; † mort als 1 da november 2000) d’eira ün teolog svedais i’l 20avel tschientiner. Independent da las teologias principalas, chi dominaivan da quel temp las universitats e la vita ecclesiastica in Europa centrala, sviluppaiva Wingren ün agen concept d'üna teologia sistematica.

Teologia

Seis concept teologic ha i’l center l’impissamaint cha Gesu Crist renovescha la creaziun oriunda e deliberescha il vegl Adam in seis bsögn ed in sia praschun d'egoissem in möd ch'el til cloma illa libertà e schoglia seis lioms.

Sia critica as drizzaiva impustüt vers Rudolf Bultmann e Karl Barth. L'imbüttamaint da Wingren tunaiva cha tuots duos hajan invlidà da resguardar inandret il Vegl Testamaint e qua in prüma lingia il raquint da la creaziun. Mincha teologia biblica stoja cumanzar cul prüm artichel da la credentscha apostolica causa cha Gesu Crist (dal qual il seguond artichel tratta) saja la resposta sün quel. La concentraziun sün Gesu Crist ed il principi da la teologia pro el sun per Wingren vias orbas chi mainan davent da la Bibla e chi blockeschan implü il dialog necessari culla cultura seculara.

Perdüttas principals da la teologia da Wingren d'eiran cuntinuadamaing Irenäus da Lyon e Martin Luther.

Ouvras (in traducziun tudais-cha autorisada), üna tscherna

• Der Mensch und die Inkarnation nach Irenäus, 1947 (= L'uman e l'incarnaziun tenor Irenäus)
• Luthers Lehre vom Beruf, 1952 (= La doctrina da Luther davart la professiun)
• Die Methodenfrage der Theologie, 1956 (= La dumanda da metodas illa teologia)
• Die Predigt. Eine prinzipielle Studie, 1959 (= La predgia. Ün stüdi fundamental)
• Schöpfung und Gesetz, 1960 (= creaziun e ledscha)
• Evangelium und Kirche, 1963 (= evangeli e baselgia)
• Gestalt einer Kirche von morgen. Der theologische Entwurf des Schweden Einar Billing, 1969 (= la fuorma d'üna baselgia da daman. Il model teologic dal svedais Einar Billing)
• Adam sind wir. Drei Vorträge zum Glaubensbekenntnis, 1970 (= Adam e nus. Trais referats a la credentscha [apostolica])