Martin Tucek (* 14 da favrer 1955 a Turitg) è in pedagog svizzer ed anteriur president da la partida La Verda en il Grischun.

BiografiaModifitgar

Martin Tucek è naschì a Turitg sco figl da Jana Melichar, psichiatra e Miroslav Tucek, anteriur parsura da l'Archiv social svizzer. Suenter aver frequentà la scola primara a Meilen ed il collegi a Zug, è el entrà en il seminari scolastic a Rickenbach ZH ed è daventà magister. Si'emprima plazza era ina scola cumplessiva en la Svizra Centrala ed al Lai da Turitg. A l'Universitad da Turitg ha el concludì il studi da licenziat da pedagogia e psicologia. Dasperas ha el tranter auter dà ballape en la liga naziunala e fatg la patenta sco magister da skis. Lu ha el fatg da magister da skis en ils Rocky Mountains. Suenter las nozzas e la naschientscha da ses figl era el co-directur d'in'organisaziun per persunas cun impediments ed incumbensà per la protecziun d'uffants a Graz en l'Austria. En quel rom ha el publitgà divers artitgels davart singularitads dal cumportament (Verhaltensauffälligkeiten) tar uffants ed è s'engaschà per l'emprima profilaxa cunter drogas a Graz. Da return en Svizra è el sa fatg scolar sco pedagog curativ e supervisor. Dapi il 2004 viva Tucek en la culegna da gualsers Mut ed instruescha sco magister dal stgalim superiur e pedagog curativ.

Tucek ha fundà il 2007 la partida La Verda dal Grischun,[1] da la quala el è stà president fin il 2009.[2]

ReferenzasModifitgar

  1. Gründung von Grünen Parteien in Schwyz und Graubünden
  2. Die Grünen melden sich mit Leitbild und neuem Namen zurück