Martin Weinek

Questa pagina è scritta en puter.

Martin Weinek (Leoben, 11 lügl 1964) es ün actur, realisatur da film e interprendider da vin austriac. El lavura per televisiun, kino e teater, ma es renumno specialmaing per ch'el faisaiva l'inspectur Fritz Kunz illa seria televisiva Kommissar Rex.

Martin Weinek (a dretta) culs actuors
Kaspar Capparoni e Denise Zich

Carriera

Cumanzamaint

Zieva sia furmaziun traunter 1983 e 1986 tar il professur Peter P. Jost, fet Martin Weinek teater a Vienna daspö 1986. Sia prüma pitschna appariziun in ün film füt in Nachsaison, inua ch'el faisaiva la rolla d'ün liftier.

Dal 1987 pigliet el part a la lavur da teater Der Lechner Edi schaut ins Paradies da Jura Soyfer (dirigida da Georg Mittendrein) duraunt il "Ruhrfestspiele Recklinghausen", festival chi ho lö illa cited tudas-cha da Recklinghausen. In listess an fet el la rolla dal scuavias i'l film Müllomania da Dieter Berner.

Traunter 1988 e 1989 lavuret el tar il "Teater Jura Soyfer" da Vienna ed oter teaters; in quista perioda fet el eir il directur da lavurs da teater, il directur artistic e'l productur. Als 1989 recitet el illa seria televisiva austriaca Calavati Joe. Traunter 1990 e 1991 füt el directur artistic dal "Hernalser Stadttheater" da Vienna.

Kommissar Rex

Martin Weinek dvantet renumno grazcha a la seria televisiva Kommissar Rex, inua ch'el gnit dal 1999 daspö la settevla episoda da la tschinchevla seria. El faisaiva la rolla da l'inspectur Fritz Kunz, chi substituiva l'inspectur Peter Höllerer (interpreto da l'actur Wolf Bachofner).

El restet illa equippa da la seria fin 2004 (deschevla seria), l'ultima chi vaiva lö a Vienna (zieva dvantet il lö Roma). Tuottüna pigliet el part a la prüma episoda da l'ündeschevla seria (2008) ed uossa è'l illa equippa d'actuors da la nouva seria, chi gnaro transmessa dal 2009).

In Svizra vain quista seria transmessa da las televisiuns DRS (in tudas-ch), TSR (in frances) e RTSI (in taliaun).

Otras activiteds

Martin Weinek ho eir fich gugent il vin e la viticultura: pelvaira daspö 1993 ho'l var trais hectaras da vignas a Hagensdorf (fracziun da la vschinauncha austriaca da Heiligenbrunn), da la quela el s'occupescha insembel cun sia duonna Eva, ella svessa actura.

Als 8 marz 2008 ho'l piglio part a las manifestaziuns da saira dal "Genusse Burgenland 2008".

Films

• 1989: Calavati Joe (seria televisiva)
• 1999-2004: Kommissar Rex (seria televisiva)
• 2004: Silentium
• 2005: Grenzverkehr
• 2006: Unter weißen Segeln (episoda Träume am Horizont)
• 2007: Die Rosenheim-Cops (episodia Liebe bis zum Ende)
• 2008: Rex (seria televisiva, be la prüma episoda)

Colliaziuns

• Martin Weinek sün "Internet Movie Database"
• Cuors da la vita sül website da l'ORF (televisiun naziunala austriaca)
• Cuors da la vita sül website da l'"Agentur Nielsen/Bremen"
• Weinek scu viticultur

Commons

Commons: Martin Weinek – Collecziun da maletgs, videos e datotecas d'audio