Quacras
Quacra nanina (Coturnix chinensis)
Classificaziun
Tschep Chordata
Classa Utschels (Aves)
Urden Utschels-giaglina (Galliformes)
Num scientific

Quacras è ina noziun collectiva per pliras gruppas d’utschels entaifer l’urden dals utschels-giaglina (Galliformes). Cun in’autezza da ca. 20 cm furman las quacras las spezias las pli pitschnas entaifer quest urden. Las quacras vegnan adina pli popularas sco animals da chasa, perquai ch’ellas dovran damain plaz che autras giaglinas; lur ovs e charn valan sco delicatessa. Adattadas per tegnair sco animal da chasa èn la quacra nanina, la quacra giapunaisa e la quacra da tschof.

Quest artitgel dat ina survista da tut las gruppas d’utschels cun num ‹quacra›. Entaifer la sistematica da la biologia designescha il term percunter be il gener da las quacras da terra (Coturnix) u è schizunt reservà per la spezia indigena (Coturnix coturnix).

L’urden dals utschels-giaglina modifitgar

Tar l’urden dals utschels-giaglina tutgan 5 famiglias. Auter ch’ils fasans èn quai tut famiglias na-europeicas, oriundamain da chasa en l’Africa (p.ex. la giaglina perlada), en l’Asia u en l’America. Tranter ellas è gia da chattar l’emprima giada il num ‹quacra›, numnadamain per la famiglia da las quacras da dents (Odontophoridae). Questa famiglia cumpiglia 9 categorias e 31 spezias ed è da chasa en l’America dal Nord e dal Sid. Las singulas spezias sumeglian bain a las pernischs ed al gener da las quacras, ma ellas èn be parentadas dalunsch cun quellas. La pli enconuschenta spezia da las quacras da dents è bain la quacra da tschof che vegn magari tegnida tar nus en volieras. Ins la chatta dentant bler main savens sco animal da chasa che la quacra giapunaisa e la quacra nanina.

La famiglia dals fasans modifitgar

Ils fasans (Phasianidae) furman per lunsch or la gronda famiglia entaifer l’urden dals utschels-giaglina. Sper ils fasans sco tals cumpiglia questa famiglia tranter auter las giaglinas, las pernischs, ils galdins, las giaglinas selvadias, ils pavuns e las quacras. Sper las spezias ch’appartegna a las quacras da terra datti radund diesch differentas spezias cun il num ‹quacras› che giaschan sistematicamain ordaifer quest gener. Tuttas èn da chasa en l’Africa u en l’Orient Extrem.

Il gener da las quacras da terra modifitgar

 
Quacra europeica (Coturnix coturnix)

Il gener da las quacras da terra (Coturnix) cumpiglia otg spezias. Tut las quacras da terra han ina statura pitschna e plitost radunda ed ina cua fitg curta, cuvrida da las alas.

Las quacras sa nutreschan da sems e d’insects. Il gnieu bajegian ellas en ina rusna guliva, nua che la giaglina metta 8–13 ovs. Ils pulschains naschan suenter 17 dis.

La suletta spezia indigena è la quacra europeica, er numnada be quacra (Coturnix coturnix). Che la quacra era ina giada in utschè fitg derasà ed enconuschent tar nus tradescha la poesia Il cont della quacra[1] da Giacun Hasper Muoth. Ozendi è la quacra europeica selvadia periclitada fermamain.

La quacra giapunaisa (Coturnix japonica) vegn tegnida tar nus sco furnitura d’ovs e da charn. Ina suletta giaglina producescha radund 250–300 ovs per onn. Tant ils ovs sco la charn da la quacra giapunaisa valan sco delicatessas e vegnan duvrads savens en la haute cuisine. L’element distinctiv il pli bain vesaivel per differenziar la giaglina ed il cot da la quacra giapunaisa è il maletg dal pèz: tar la giaglina è quel taclà, entant ch’il pèz dal cot è cler e brin-cotschen.

Populara sco utschè decorativ è la quacra nanina, er numnada quacra chinaisa (Coturnix chinensis). Cun ina paisa da be 45 fin 70 grams ed in’autezza da ca. 14 cm furman las quacras naninas la spezia la pli pitschna entaifer las quacras.

Tegnair quacras sco animals da chasa modifitgar

 
Cumparegliaziun tranter l’ov da la giaglina da chasa e l’ov da la quacra (giapunaisa)

Quacras vegnan pli e pli popularas sco animals da chasa, perquai ch’ellas dovran pauc spazi en cumparegliaziun cun las giaglinas. Entant che las quacras vivan en la natira plitost en il zuppà, pon ellas daventar detg famigliaras en il chaset. Impurtant è ch’ins las tegnia en moda adequata e sa fatschentia avunda cun ellas. En la natira cuntanschan las quacras ina vegliadetgna da radund dus onns; tgiradas bain pon ellas cuntanscher en il giagliner ina vegliadetgna da tschintg onns.

Annotaziuns modifitgar

  1. Il cont della quacra sin Wikisource

Colliaziuns modifitgar

  Commons: Coturnix – Collecziun da maletgs, videos e datotecas d'audio
  Commons: Odontophoridae – Collecziun da maletgs, videos e datotecas d'audio