San Niculò (Puntraschigna)
|
Questa pagina è scritta en puter. |
San Niculò es üna baselgia refurmeda a Puntraschigna in l'Engiadin'Ota. L'edifizi sacrel es situo immez da la vschinaucha aint il quartier Laret. La fabricaziun vaiva lö circa dal 1640 zieva cha'ls scumpigls grischuns vaivan glivro. Il stil do perdütta da l'epoca da baroc. Il clucher s'avaiva rechatto pü bod da l'otra vart da la via maistra. El ho müdo sieu lö pür dal 1887. Quista müdeda vaiva da chefer cul svilup da Puntraschigna chi dvantaiva düraunt be pochs decennis ün center da turissem.
Oriundamaing tuchaiva Puntraschigna in reguard als drets ecclesiastics a Samedan. La dependenza finiva cuort avaunt cha la refurmaziun cumanzaiva a's deraser ed a müder l'Europa.
Puntraschigna d'eira la prüma raspeda in l'Engiadin'Ota chi s'ho vout vers la refuorma. Già dal 1537 ho existieu üna comunited evangelica tenor la confessiun refurmeda. Scu baselgia principela gniva druveda Santa Maria fin cha il nouv fabricat da San Niculò la rimplazzaiva.
San Niculò d'eira exaimpel e muostra architectonica pella baselgia Bel Taimpel a Schlarigna.
La corporaziun evangelica da Puntraschigna es commember da la Baselgia evangelica refurmeda dal Grischun. Infra la baselgia chantunela es la part refurmeda da Puntraschigna integreda i'l colloqui d'Engiadin'Ota-Bregaglia-Poschiavo-Sursès.
Ravarenda d'eira fin 2014 David Last chi ho müdo a Sagogn. Sia successura es Maria Schneebeli da Winterthur.
Colliaziuns
modifitgar
Commons: San Niculò (Pontresina) – Collecziun da maletgs, videos e datotecas d'audio