Utilisader:Andreas/Plazzals/Madleina Popescu-Marin
Magdalena Popescu-Marin (* 18 da fanadur 1933 a Roman, circul da Neamț, Rumenia) è ina romanista, retoromanista e translatura rumena.
Marin-Popescu discurra currentamain sursilvan[1] e fa s'adressar en Svizra sco Madleina Popescu-Marin.[2] Ella scriva en periodicas litteraras rumenas davart la scena litterara rumantscha e translatescha cudeschs rumantschs en rumen.
Vita ed ovra modifitgar
Madleina Popescu-Marin è naschida a Roman, in municipi en la regiun Moldavia en il nordost da la Rumenia, sco figlia da l'uffiziant sanitar militar Ioan Popescu e sia dunna Elena, naschida Vasiliu. Ella ha frequentà la scola primara ed il gimnasi en sia vischnanca natala e dal 1952 al 1957 la Facultad da filologia a l'Universitad da Bucarest. Ses rom d'accent principal era il rumen, quel secundar il franzos. Il 1974 ha ella doctorà en filologia tar Alexandru Graur cun ina lavur davart la furmaziun da pleds en il rumen. Ella ha lavurà dal 1957 fin al 1992 e puspè dal 1999 fin oz en il sectur da grammatica da l'Institut da linguistica da l'Academia rumena. Popescu-Marin è stada cunautura da pliras ovras normativas impurtantas dal rumen: il Dicziunari invers (1957), la Grammatica da l'Academia rumena (2 toms, 1966 e 2005), il tractat La furmaziun dals pleds en rumen (1970–1989), il Dicziunari ortografic, ortoepic e morfologic da la lingua rumena (1982), il Dicziunari pratic da la lingua rumena (1995), il Dicziunari explicativ ed enciclopedic da la lingua rumena (1998), il Dicziunari rumen dals neologissems (2000) ed auters pli. Ensemen cun Tudora Şandru Mehedinţi ha ella tgirà e translatà l'ediziun en lingua rumena dal Dicziunari etimologic rumen dad Alexandru Ciorănescu, cumparì il 2001. Ciorănescu ha redigì quel dicziunari en l'exil en Spagna in lingua spagnola.
Il 1973 ha Madleina Popescu-Marin cumenzà a studegiar rumantsch, quai ch'è daventà in'ulteriur rom d'accent en ses studis. A partir dal 1974 ha ella frequentà numerus curs da rumantsch en Svizra. En quest champ sa fatschenta ella tant cun la linguistica (oravant tut cun las sumeglientschas tranter il rumen ed il rumantsch) sco era cun la litteratura. Ella ha fatg enconuschent en ses pajais la litteratura rumantscha cun publitgar ina seria d'artitgels en revistas litteraras sco România literara, Arc, Luceafarul ed auters. Il 1980 ha ella edì ensemen cun il filolog rumantsch-american Augustin Maissen in'antologia da poesias rumantschas cun versiuns en rumens. Il 1992 suandava ina raschlada da texts en prosa, medemamain cun translaziuns en rumen. Dapi lura ha ella translatà e publitgà versiuns rumenas da plirs cudeschs rumantsch. Madleina Popescu-Marin ha divers projects sumegliants en curs da realisaziun, betg mo areguard il rumantsch ma era las autras linguas discurridas en Svizra. Ella è collavuratura da las principalas periodicas en lingua rumantscha, numnadamain da la Gasetta Romontscha resp. La Quotidiana, las Annalas, Igl Ischi e la Litteratura.
Madleina Popescu-Marin è commembra da l'uniun da scripturs rumena e da l'Uniun per la Litteratura Rumantscha. Ella è l'unica estra che ha survegnì il Premi da reconuschientscha dal Chantun Grischun (1999). Il 2004 ha ella survegnì il Premi per translaziuns da la fundaziun culturala svizra Pro Helvetia ed il 2007 il Premi da l'Academia rumena per la contribuziun a la Grammatica da l'Academia rumena il 2005.[3][4]
Publicaziuns modifitgar
Cudeschs | |||
---|---|---|---|
|
Translaziuns dad ovras rumantschas | |||
---|---|---|---|
|
Artitgels en rumantsch (selecziun) | |||
---|---|---|---|
|
Litteratura en rumantsch (selecziun) | |||
---|---|---|---|
|
Artitgels en rumen (e franzos) davart la lingua rumantscha (selecziun) | |||
---|---|---|---|
|
Artitgels en rumen (e franzos) davart la litteratura rumantscha (selecziun) | |||
---|---|---|---|
|
Colliaziuns modifitgar
- ...
Referenzas modifitgar
- ↑ (rumen) Premiu de recunostintă de Tudora Şandru-Mehedinţi. En: România literară nr. 45 dal 1999: «Magdalena Popescu-Marin este unica specialistă din România si din Balcani ăn acest domeniu, ea cunoscând ăn profunzime romansa (vorbeste curent dialectul sursilvan), ca si literatura si cultura acestui interesant idiom romanic.» (consultà ils 14 d'avrigl 2013)
- ↑ (rumantsch) Discurs cun Magdalena Popescu-Marin, Bucarest (Rumenia). En l'emissiun Profil dal Radio Rumantsch dals 11 da november 2006 (consultà ils 14 d'avrigl 2013)
- ↑ (franzos, rumen) Curriculum vitae da Magdalena Popescu-Marin cun glista da publicaziuns (consultà ils 14 d'avrigl 2013)
- ↑ (rumen) Magdalena Popescu-Marin tar crispedia.ro (consultà ils 14 d'avrigl 2013)