Questa pagina è scritta en puter.

Alois Carigiet (Trun, 30 avuost 1902 - 1. avuost 1985) füt ün pictur, dissegnadur ed autur da cudeschs pella giuventüna svizzer.

Biografia modifitgar

Originar da la Surselva, i'l Chantun Grischun, eira Alois Carigiet il frer il pü grand dal cumediant Zarli Carigiet.

Dal 1911 cun sieus genituors get el a Cuira, inua ch'el cumanzet ün giarsunedi scu pictur da decoraziun, e zieva a Turich, inua ch'el lavuret tar ün atelier da reclama. Dal 1927 avrit el ün propi atelier, i'l quêl el dissegnet scenas e costums per ün cabaret. Dal 1939 turnet el in Surselva, a Sursaissa, e dvantet ün artist independent, na pü be grafiker.

A Sursaissa cumanzet Carigiet ad illustrer cudeschs pella giuventüna. Il pü renumno es sainza dubi Uorsin, scrit dal 1945 da l'autura engiadinaisa Selina Chönz, chi vendet pü d'ün milliun da copias. Grazcha eir a sias illustraziuns contribuet el a fer cugnuoscher la festa ladina dal Chalandamarz in tuot il muond.

Ils oters cudeschs illustros da Carigiet, scu Flurina, nu vettan listess success da public, ma sias illustraziuns sun adüna da grand valur.

Zieva seguittan sias exposiziuns a Schaffusa, Soloturn e Genevra. Dal 1950 turnet el a Turich. Dal 1956 fet el üna granda pictura sülla fatschada da l'Hotel Adler a Stein am Rhein, cumischiuneda da la bieraria Falken da Schaffusa.

Dal 1960 turnet el in Grischun, inua ch'el as dedichet danövmaing a l'illustraziun da cudeschs. Carigiet svess scrivet ün pêr cudeschs pella giuventüna.

Premis modifitgar

  • Premi Hans Christian Andersen 1966 scu meglder dissegnadur
  • Schweizer Jugendbuchpreis ("Premi svizzer da cudeschs pella giuventüna") 1966 scu autur da Zottel, Zick und Zwerg

Ouvras modifitgar

Scu dissegnadur da cudeschs modifitgar

  • Selina Chönz: Uorsin (1945)
  • Selina Chönz; Flurina (1952)
  • Selina Chönz: Der grosse Schnee (1953, "Naiveras")

Scu autur da cudeschs modifitgar

  • Zottel, Zick und Zwerg (1965)
  • Birnbaum, Birke, Berberitze (1967)
  • Maurus und Madleina (1969)

Colliaziuns modifitgar