Alvra (vischnanca)

Alvra
Vischnanca
Casti
Vopna
Administraziun
Stadi	Svizra
Chantun	Grischun
Regiun	Alvra
President communal	Daniel Albertin (PCD)
Territori
Autezza	859 m s.m.
Surfatscha	93,63 km²
Populaziun	1288 abitants (31 da december 2021)
Spessezza	1322 ab./km²
Fracziuns	Alvagni, Alvaschagn, Brinzauls, Casti, Mon, Stierva, Surava
Cunfina cun	Arosa, Ferrera, Filisur, Cunter, Lantsch, Mut, Salouf, Savognin, Vaz, Ziràn-Reschen
Autras infurmaziuns
Numer postal	7450
Numer UST	3542
Lingua tradiziunala	rumantsch surmiran
Internet
Pagina-web uffiziala

Alvra (tud. Albula, num ufficial biling Albula/Alvra) è ina vischnanca politica en la regiun Alvra dal chantun Grischun.

Geografia

Situaziun geografica

La vischnanca d'Alvra giascha en la Val d'Alvra sut, a la confluenza da l'Alvra cun la Gelgia. La fracziun Casti è in punct central dal traffic e giascha tranter Tusaun e Filisur (e vinavant en direcziun Pass da l'Alvra) ma era tranter Lai/Planeiras e Savognin (e vinavant en direcziun Pass dal Güglia u Gelgia).

Il punct il pli da la vischnanca cun 3098 m s.m. sa chatta 200 m al nordvest dal Piz Mitgel, entant ch'il punct il pli bass cun 824 m s.m è al lai da farmada da Solas.

Territori communal

Tenor las cifras dal 2009 avevan las anteriuras vischnancas che furman Alvra ina surfatscha territoriala da 93,93 km². Da quels eran 26.37 km² u 28.1% territori agricul, entant che 43.53 km² u 46.3% eran cuverts da guaud. Dal rest eran 2.62 km² u 2.8% territori abità (edificis u stradas), 0.99 km² u 1.1% eran lais e flums e 20.46 km² u 21.8% eran territori nunproductiv.

Dal territori surbajegià eran 0,9 % edificis e 1,3 % infrastructura da traffic e transport. Dal territori da guaud eran 41,3% cuverts cun guaud serrà e 2,1% cun guaudets e pitschnas gruppas da plantas. Dal territori agricul era 1,0% vegnì duvrà per cultivar graun, 8,6% eran pastgiras ed 18,5% eran alps. Dals auas eran 0,2% lais e 0,8% eran flums ed auals. Dal territori nunproductiv eran 6,4% vegetaziun nunproductiva e 15,4% eran memia grippus per vegetaziun.

Fracziuns

Fracziuns da la vischnanca d'Alvra èn la suandantas anteriuras vischnancas:

Num	Surfatscha km²	Abitants 31 da december 2013	Spessezza
Alvagni	35,63	403	11
Alvaschagn	4,08	142	35
Brinzauls	13,37	128	10
Casti	14,85	254	17
Mon	8,46	90	11
Stierva	10,56	134	13
Surava	6,68	196	29
Total	93,63	1347	14

Vischnancas cunfinantas

La vischnanca d'Alvra cunfina cun Arosa, Ferrera, Filisur, Cunter, Lantsch, Mut, Salouf, Savognin, Vaz e Ziràn-Reschen.

Clima

Casti ha en media 98,6 dis da plievgia per onn cun precipitaziuns medias da 784 mm. Il mais il pli umid è l'avust cun precipitaziuns medias da 110 mm. Durant quel mais datti en media 10,8 dis da precipitaziuns. Il mais cun ils pli blers dis da precipitaziuns è il zercladur cun ina media da 11,3 dis ma be 92 mm da precipitaziuns. Il mais il pli setg è il favrer cun ina media da 35 mm da precipitaziuns sur 10,8 dis.

Istorgia

La vischnanca è naschida il 1. da schaner 2015 entras la fusiun da la vischnancas fin qua independentas Alvagni, Alvaschagn, Brinzauls, Casti, Mon, Stierva e Surava. Las set vischnancas ha approvà il contract da fusiun ils 28 da favrer 2014. Oriundamain fascheva era la vischnanca da Lantsch part dal project da fusiun, ma ella è sa retirada il settember 2013 da las tractativas.

Sco emprim president communal è vegnì elegì ils 28 da settember 2014 Daniel Albertin cun 235 da 271 vuschs valaivlas. Albertin è deputà da la PCD en il Cussegl grond dal Grischun ed era al temp da l'elecziun anc preseident communal da Mon.

Fin la fin dal 2015 fascheva la vischnanca d'Alvra part dal circul d'Alvaschagn en il district da l'Alvra. Cun la refurma territoriala grischuna èn ils circuls vegnids abolids ed ils districts èn vegnids remplazzads cun regiuns.

Populaziun

Svilup da la populaziun

Onn	1850	1860	1870	1880	1890	1900	1910	1920
Surava	159	170	-	-	137	148	160	184
Brinzauls	191	205	334	300	146	158	149	148
Alvagni	354	364	369	314	321	382	407	421
Casti	135	160	191	209	199	257	241	230
Stierva	179	176	177	193	178	150	137	132
Mon	155	165	140	125	119	112	104	118
Alvaschagn	156	137	150	140	144	276	165	181

Onn	1930	1940	1950	1960	1970	1980	1990	2000
Surava	198	242	203	195	200	192	210	250
Brinzauls	175	186	172	112	121	95	112	117
Alvagni	441	482	475	396	421	379	380	403
Casti	238	270	327	306	310	227	239	230
Stierva	179	176	177	193	178	150	137	132
Mon	144	152	150	130	114	113	100	128
Alvaschagn	208	178	208	185	235	149	145	154

Linguas

Tenor la constituziun communala, che las vischnancas pertutgadas han acceptà a l'urna ils 24 d'avust 2014 e che la Regenza grischuna ha approvà, èn las linguas ufficialas da la vischnanca tudestg e rumantsch. Areguard il rumantsch vala che l'administraziun dovra l'idiom surmiran, lingua da scola è dentant rumantsch grischun.

Politica

President communal

President da la vischnanca è Daniel Albertin da la Partida cristiandemocratica svizra (PCD). El è vegnì elegì ils 28 da settember 2014 cun cun 235 dals 271 vuschs valaivlas. Al temp da l'elecziun era Albertin president communal da Mon, ina da las vischnancas che uss furman Alvra.

Vopna

Vopna

Blasonament:

In Rot über gewelltem und dreimal geteiltem Schildfuss von Weiss/Blau/Weiss/Blau sieben fünfstrahlige gelbe Sterne, kreisförmig angeordnet.

Las set stailas represchentan las set vischnancas ch'èn s'unidas. Las undas en il pe dal stgid (Schildfuss) simboliseschan il flum Alvra che dat il num a la nova vischnanca.

La fundaziun Stiftung Schweizer Wappen und Fahnen, che giuditgescha las vopnas da vischnancas fusiunadas, ha da la vopna il predicat cuntentaivel.

Colliaziuns

 Commons: Albula/Alvra – Collecziun da maletgs, videos e datotecas d'audio

• Pagina-web ufficiala da la vischnanca d'Alvra (rumantsch surmiran, tudestg)