Haddaway
Quist artichel es scrit in rumauntsch puter |
Alexander Nestor Haddaway, meglder cuntschieu be scu Haddaway (Trinidad, 9 schner 1965) es ün chantadur da musica da disco naschieu in Trinidad e Tobago. El dvantet renumno dal 1993 culla chanzun What is Love ("Che es amur"), chi vet fich success in tuot il muond.
Biografia modifitgar
Ils inizis modifitgar
Naschieu da bap ollandais oceanograf e da mama da Trinidad e Tobago fliunza, get Haddaway a viver in Europa a l'inizi dals Auns Setaunta cun sieu bap zieva'l divorzi traunter sieus genituors. Zieva qualche aun get el a viver culla mama i'ls Stedis Unidis.
Dal 1989 turnet el a viver in Europa, exactamaing in Germania, a Cologna, inua ch'el cumanzet a lavurer scu choreograf e venditur da tapetas ed a fer musica düraunt il temp liber.
Carriera modifitgar
Haddaway/The Album modifitgar
Dal 1992 signet el ün contrat culla chesa discografica tudas-cha "Coconut Records".
Dal 1993 gnit our sieu prüm album, Haddaway/The Album; sia prüma chanzun publicheda, What is Love, vet ün terribel gross success in tuot il muond; ella guadagnet la prüma posiziun illas parada da hits da bgers stedis: Svizra, Austria, Irlanda, Danemarc, Finlanda, Norvegia, Germania, Frauntscha, Spagna, Italia, Belgia, Pajais Bass, Lettonia, Israel e Mexico. What is Love es considereda eir hoz scu üna da las megldras chanzuns da musica da disco dals Auns Nonaunta.
Eir las otras chanzuns publichedas da Haddaway/The Album vettan fich success: Life ("Vita"; prüma posiziun in Spagna e Svezia, seguonda in Svizra), I Miss You ("Eau at perd"; 17. in Svizra) e Rock Your Heart ("Mouva ferm tieu cour"; 10. in Svizra).
L'album vendet a la fin bgers milliuns da copias.
The Drive modifitgar
Dal 1995 gnit our il seguond album da Haddaway, clamo The Drive ("La guida"). La prüma chanzun extracta da quist DC, Fly Away ("Svula davent"), vet ün bun success: in Svizra ragiundschet'la la 14. posiziun da la parada da hits.
Oters chanzuns da quist album eiran eir Catch a Fire ("Piglia ün fö"; 20. in Svizra) e Lover Be Thy Name ("Amant saja tieu nom").
Let's Do It Now modifitgar
Dal 1998 publichet Haddaway ün nouv album, Let's Do It Now ("Fain el uossa"), chi eira cumplettamaing divers dals duos precedaints: pelvaira eiran las chanzuns da quist DC na da musica da disco, ma da musica soul; uschè nu vet el fich success.
Ültimas activiteds modifitgar
Haddaway apparet darcho sülla scena dal 2004 i'l program da la televisiun tudas-cha Comeback reality television show e dal 2005 i'ls simils programs ingles ed americaun da listess nom, Hit Me Baby One More Time.
Ils meg 2008 publichet el la chanzun I Love the 90's ("Eau d'he gugent ils Auns Nonaunta"), chanteda insembel cun Dr. Alban, oter renumno chantadur da musica da disco dals Auns Nonaunta.
Sias lavuors modifitgar
Albums modifitgar
- 1993 Haddaway/The Album
- 1995 The Drive
- 1998 Let's Do It Now
- 1999 All The Best His Greatest Hits
- 2001 My Face
- 2002 The Greatest Hits
- 2002 Love Makes
- 2004 What Is Love - The Greatest Hits
- 2005 Pop Splits
- 2007 Crucified
DC singuls modifitgar
- 1993 What Is Love
- 1993 Life
- 1993 I Miss You
- 1994 Rock My Heart
- 1995 Fly Away
- 1995 Catch A Fire
- 1995 Lover Be Thy Name
- 1997 What About Me
- 1998 Who Do You Love
- 1998 You're Taking My Heart
- 2001 Deep
- 2002 Love Makes
- 2003 What Is Love Reloaded
- 2005 Spaceman
- 2005 Missionary Man
- 2007 Follow Me
- 2008 I Love The 90's (cun Dr. Alban)